Uncategorized

Sunday Homily Denehakalam 6th Sunday, Fr Jacob Naluparayil MCBS

ദനഹാ 6- ഞായർ

യോഹ 3:22-31

2017 ഫെബ്രുവരി 12

ഡോ. ജെ. നാലുപറയിൽ

”എന്റെ സന്തോഷം ഇപ്പോൾ പൂർണ്ണമായിരിക്കുന്നു.” യോഹ 3-29-ാമത്തെ വചനമാണിത്. പൂർണ്ണമായ സന്തോഷം ലഭിക്കാനുള്ള വഴി എന്താണ്? ഇതാണ് ഇന്നത്തെ സുവിശേഷം നമുക്ക് പറഞ്ഞുതരുന്നത്.
ഇത് പറയുന്നത് സ്‌നാപക യോഹന്നാനാണ്. പൂർണ്ണമായ സന്തോഷം ലഭിക്കാനുള്ള ഒന്നാമത്തെ പടി താൻ ആരാണെന്നുള്ള അറിവാണ്. ”താൻ ക്രിസ്തുവല്ല, അവന് മുമ്പേ വന്നവനാണെന്ന്” 3:28-ൽ യോഹന്നാൻ പറയുന്നു. സമാനമായ പറച്ചിൽ നേരത്തെയും സ്‌നാപകൻ നടത്തിയിട്ടുണ്ട്. 1:19-ൽ അവൻ പറഞ്ഞു, താൻ ക്രിസ്തുവല്ല; ഏലിയാ ആണോ? അതുമല്ല, പ്രവാചകൻ ആണോ? അതുമല്ലെന്ന് യോഹന്നാൻ പറയുമ്പോൾ പിന്നെ ആരെന്നാണ് ചോദ്യം. അതിന് മറുപടിയായി അദ്ദേഹം പറയുന്നത്- താൻ ശബ്ദമാണെന്നാണ്. മരുഭൂമിയിലെ ശബ്ദം.
ചുരുക്കത്തിൽ താൻ ആരാണെന്ന് വളരെ കൃത്യമായി സ്‌നാപകന് അറിയാമായിരുന്നു. നിന്റെ സന്തോഷം പൂർണ്ണമാകാനുള്ള ആദ്യപടി നീ ആരാണെന്ന് അറിയുകയാണ്. പോരാ, നിന്റെ ജീവിതത്തിന്റെ ധർമം എന്താണെന്ന് അറിയുക. ഇതാണ് ജീവിതം സന്തോഷകരമാകാനുള്ള ആദ്യപടി.
സത്യത്തിൽ പേരന്റിങിന്റെ പ്രധാനപാഠവും ഇതു തന്നെയാണ്. ഓരോ കുട്ടിയിലും ദൈവം ഒരു സവിശേഷ നന്മ ഒളിപ്പിച്ചു വച്ചിട്ടുണ്ട്. അത് തിരിച്ചറിഞ്ഞ് വളർത്തിയെടുക്കുകയാണ് മാതാപിതാക്കളുടെയും അധ്യാപകരുടെയും ധർമം. ഓരോ കുഞ്ഞിനെയും അറിയുക, അവന്റെ/അവളുടെ സവിശേഷ നന്മ തിരിച്ചറിഞ്ഞ് വളർത്തുക. അപ്പോഴാണ് അവന്റെ/അവളുടെ ജീവിതം സന്തോഷകരമാകുന്നത്. ഫ്രാൻസീസ് പാപ്പായുടെ ”സ്‌നേഹത്തിന്റെ സന്തോഷമെന്ന” അപ്പസ്‌തോലിക പ്രബോധനത്തിന്റെ ഒരു അധ്യായം മുഴുവൻ ഇതിനെക്കുറിച്ചാണ് പറയുന്നത്.
ഇതിനുള്ള നല്ല ഒരു ഉദാഹരണം സ്ഫടികം എന്ന സിനിമയാണ്. തോമസ് ചാക്കോ എന്ന ടാലന്റണ്ട് കുട്ടി, ആടു തോമായെന്ന ക്രിമിനൽ ആയി മാറിയ കഥ പേരന്റിങ്ങിന്റെ പരാജയ കഥയാണ് (വിശദമായ ചർച്ചയ്ക്ക് പ്രസംഗത്തിന്റെ ഓഡിയോ കേൾക്കുക).
”മണവാളന്റെ സ്‌നേഹിതൻ അവന്റെ സ്വരത്തിൽ സന്തോഷിക്കുന്നു,” ഇത് യോഹ 3:29-ാമത്തെ വചനമാണ്. ഇത് പറയുന്നത് സ്‌നാപകനാണ്. താൻ ആരാണെന്നും തന്റെ ജീവിതധർമം എന്താണെന്നും തിരിച്ചറിയുന്ന സ്‌നാപകൻ ക്രിസ്തുവെന്ന മണവാളന്റെ സ്വരത്തിലും സാന്നിധ്യത്തിലും സന്തോഷിക്കുന്നു. സ്വന്തം ജീവിതധർമം എന്താണെന്ന് അറിയാവുന്നവൻ, അടുത്തുള്ളവന്റെ നന്മകാണുമ്പോൾ അതിൽ അസൂയതോന്നില്ല; അപകർഷതാബോധം ഉണ്ടാകില്ല; അസ്വസ്ഥത തോന്നില്ല. മറിച്ച് അവന് അതിൽ സന്തോഷിക്കാനാകും. അതിനാലാണ് യേശുവിന്റെ അടുത്തേക്ക് കൂടുതൽ ആളുകൾ പോകുമ്പോൾ സ്‌നാപകന് ഏറെ സന്തോഷിക്കാനാകുന്നത്.
ഒരു ഉദഹരണം ശ്രേയക്കുട്ടിയുടെ പാട്ടുകേട്ടിരുന്ന മലയാളത്തിലെ മുന്തിയ നടന്മാരും, പാട്ടുകാരും, സംവിധായകരും സന്തോഷിക്കുന്ന രംഗമാണ് (വിശദീകരത്തിന് പ്രസംഗത്തിന്റെ ഓഡിയോ കേൾക്കുക). കാരണം എന്താണ്? സ്വന്തം ജീവിതത്തിന്റെ നന്മ തിരിച്ചറിഞ്ഞവർക്ക് മറ്റുള്ളവരുടെ നന്മയിൽ സന്തോഷിക്കാൻ കഴിയുന്നു.
യോഹ 3:30ൽ പറയുന്നത് അടുത്ത പടിയാണ്. ”അവൻ വളരുകയും ഞാൻ കുറയുകയും ചെയ്യണം.” ഇത് സ്‌നാപക മനോഭാവത്തിന്റെ കൊടുമുടിയാണ്. അതായത് താൻ ആരാണെന്നും തന്റെ ജീവിതധർമം എന്താണെന്നും അറിയുന്നവന് സ്വന്തം ജീവിതത്തിൽ സന്തോഷം കണ്ടെത്താനാകുന്നു. പോരാ, അടുത്തുള്ളവന്റെ നന്മയിൽ അവൻ ആഹ്ലാദിക്കാൻ പറ്റുന്നു. അതിനുമപ്പുറത്ത്, അപരന്റെ വളർച്ചക്കായി അൽപമൊന്ന് ചുരുങ്ങാൻ, അൽപമൊന്നു ഒതുങ്ങാനുള്ള മനസ്സുണ്ടാകുന്നു. അവനെ വളർത്തുന്നതിൽ ഒരു പങ്കുവഹിക്കാൻ പറ്റുന്നു. അപ്പോഴാണ് അവന്റെ സന്തോഷം അതിന്റെ പൂർണ്ണതയിലെത്തുന്നത്.
ഇതിന് ഏറ്റവും നല്ല ഉദാഹരണം ഫ്രാൻസീസ് പാപ്പായ്ക്ക് നിക്കോളാസ് എന്ന അർജന്റീനക്കാരൻ ബാലൻ എഴുതിയ കത്താണ് (പ്രസംഗത്തിന്റെ ഓഡിയോ കേൾക്കുക).
ചുരുക്കത്തിൽ പൂർണമായ സന്തോഷം ലഭിക്കാനുള്ള വഴിയാണ് ഇന്നത്തെ സുവിശേഷം പറഞ്ഞുതരുന്നത്. അതിന്റെ ഒന്നാം പടി താൻ ആരാണെന്നും തന്റെ ജീവിതധർമം എന്താണെന്നും തിരിച്ചറിഞ്ഞ് അത് ജീവിക്കുകയാണ്. അങ്ങനെ തൃപ്തിയോടെ ജീവിക്കുന്നവന് അപരന്റെ നന്മയിൽ സന്തോഷിക്കാനാകും. അതോടൊപ്പം അപരന്റെ വളർച്ചയ്ക്കായി അൽപമൊന്ന് ചെറുതാകാനും സാധിക്കും. അങ്ങനെയാണ് ഒരുവന്റെ സന്തോഷം അതിന്റെ പൂർണതയിൽ എത്തുന്നത്. ഇതിനുള്ള ഏറ്റവും മഹോന്നതമായ ഉദാഹരണം ക്രൂശിതനായ ക്രിസ്തുവാണ്.

Advertisements
Advertisements
Advertisements
Advertisements
Advertisements
Advertisements
Advertisements
Advertisements
Advertisements

Categories: Uncategorized

Leave a Reply

This site uses Akismet to reduce spam. Learn how your comment data is processed.