Saints

ആൾട്ടോട്ടിംഗിലെ കറുത്ത മാതാവ്

ആൾട്ടോട്ടിംഗിലെ കറുത്ത മാതാവ്
 
ജർമ്മനിയിലെ ബവേറിയൻ സംസ്ഥാനത്തിൻ്റെ ഹൃദയം (Heart of Baveria) എന്നറിയപ്പെടുന്ന പ്രസിദ്ധമായ മരിയൻ തീർത്ഥാടന കേന്ദ്രമാണ് ആൾട്ടോട്ടിംഗ് (Altötting). ദശലക്ഷക്കണക്കിനാളുകൾ പ്രതിവർഷം തീർത്ഥാടനത്തിനെത്തുന്ന ‘ജർമ്മനിയിലെ ലൂർദ്ദ്’ എന്നറിയപ്പെടുന്ന കറുത്ത മാതാവിൻ്റെ ദൈവാലയമാണ് മെയ് മാസം ഇരുപത്തിയെട്ടാം തീയതിയിലെ ഫ്രാൻസീസ് പാപ്പയുടെ പ്രാർത്ഥന മാരത്തോണിനു നേതൃത്വം വഹിക്കുന്നത്.
 
ആൾട്ടോട്ടിംഗിലെ മരിയൻ ദൈവാലയം ജർമ്മൻ ഭാഷയിൽ ഗ്നാഡെൻ കപ്പേള (Gnadenkapelle) കൃപയുടെ ചാപ്പൽ എന്നാണ് അറിയപ്പെടുന്നത്. എ ഡി 660 -ൽ നിർമ്മിച്ച അഷ്ടഭുജാകൃതിയിലുള്ള ഈ ചാപ്പൽ ജർമ്മനയിലെ ഏറ്റവും പുരാതനമായ മരിയൻ ദൈവാലയമാണ്. 66 സെൻ്റിമീറ്റർ ഉയരമുള്ള ആൾട്ടോട്ടിംഗിലെ മരിയൻ തിരുസ്വരൂപം ദേവദാരു മരത്തിൽ 1330 -കളിൽ ഗോഥിക് ശൈലിയിൽ കൊത്തിയെടുത്തതാണന്നു വിശ്വസിക്കുന്നു. റൈറ്റെൻഹാസ്ലാകിലെ സിസ്റ്റർസിയൻ ആശ്രമത്തിൽ (Raitenhaslach Cistercian Monastery) നിന്നാണ് ഈ രൂപം ആൾട്ടോട്ടിംഗിലെ മരിയൻ ദൈവാലയത്തിൽ എത്തി എന്നാണ് ചരിത്രത്തിൽ രേഖപ്പെടുത്തിയിരിക്കുന്നത്.
 
1498 -ൽ നടന്ന രണ്ട് അത്ഭുത പ്രവർത്തികളാണ് ഈ മരിയൻ ആലയത്തെ പ്രസിദ്ധമാക്കിയത്. പ്രാദേശിക പാരമ്പര്യമനുസരിച്ച് മൂന്നു വയസ്സുള്ള ഒരു ആൺകുട്ടി ആൾട്ടോട്ടിംഗിനു സമീപമുള്ള നദിയിൽ മുങ്ങി മരിച്ചു. കുട്ടിയുടെ മൃതദേഹം മാതാവിൻ്റെ അൾത്താരയിൽ കിടത്തി പ്രാർത്ഥിച്ച ഫലമായി ജീവൻ തിരിച്ചു കിട്ടി. അതേ വർഷം തന്നെ മാതാവിൻ്റെ മദ്ധ്യസ്ഥതയിലൂടെ വളരെ ബുദ്ധിമുട്ടിൽ ജീവിച്ച ഒരു കുടുംബത്തിനു സഹായം ലഭിച്ചു. അതേ വർഷം തന്നെ ആൾട്ടോട്ടിംഗിലെ കറുത്ത മാതാവിൻ്റെ സവിധത്തിലേക്കു തീർത്ഥാടനം ആരംഭിച്ചു. ലൂർദ്ദ്, ഫാത്തിമ, സെസ്റ്റോചോവ ലോറെറ്റോ എന്നീ തീർത്ഥാടന കേന്ദ്രങ്ങളോടൊപ്പം ആൾട്ടോട്ടിംഗും യുറോപ്പിലെ ശ്രീകോവില് (Sanctuaries of Europe) ഉൾപ്പെടുന്നു.
 
Our Lady of Altotting
 
തിരുസ്വരൂപത്തിൻ്റെ സവിശേഷതകൾ
 
പരിശുദ്ധ കന്യകാമറിയത്തിൻ്റെ വലതു കൈയ്യിലാണ് ഉണ്ണിയേശുവിൻ്റെ സ്ഥാനം. ഉണ്ണിയേശുവിൻ്റെ കൈവശം ദൈവത്തിൻ്റെ സർവ്വശക്തിയെ സൂചിപ്പിക്കാൻ ഒരു ആകാശഗോളം പിടിച്ചിരിക്കുന്നു. മറിയത്തിൻ്റെ ഇടതു കൈയ്യിലുള്ള അംശവടിയിൽ തളിർത്ത ലില്ലി പൂക്കൾ ഉണ്ട്. പരിശുദ്ധ മറിയത്തിൻ്റെ നിത്യകന്യാകാത്വത്തെയാണ് അത് സൂചിപ്പിക്കുന്നത്. തിരുസ്വരൂപത്തിലെ കിരീടങ്ങളും ആഭരണങ്ങളും വിറ്റെൽസ്ബാക് (Wittelsbach) രാജകുടുബാംഗങ്ങൾ ഉപകാരസ്മരണയായി കൊടുത്തതാണ്. നൂറ്റാണ്ടുകളായി രൂപത്തിനു മുമ്പിൽ കത്തിച്ച മെഴുകുതിരികളിൽ നിന്നുള്ള പുകയാലാണ് രൂപം കറുത്തതെന്നും ഈ തിരുസ്വരൂപത്തിനു കറുത്ത മാതാവ് എന്ന് പേരു വന്നതും എന്നും പറയപ്പെടുന്നു. കപ്പൂച്ചിൻ സന്യാസസമൂഹമാണ് ആൾട്ടോട്ടിംഗിലെ മരിയൻ ദൈവാലയത്തിൻ്റെ സൂക്ഷിപ്പുകാർ.
 
കരുണയുടെ തിരുവസ്ത്രം
 
1518 മുതൽ ആൾട്ടോട്ടിംഗിലെ കറുത്ത മാതാവിനെ മനോഹരമായ വസ്ത്രങ്ങൾ അണിയിക്കുന്ന പാരമ്പര്യമുണ്ട്. ഈ വസ്ത്രത്തിന് ഗ്നാഡെൻറോക്ലിൻ (Gnadenröckln) അഥവ കരുണയുടെ പാവാട എന്നാണ് വിളിപ്പേര്. ആരാധനക്രമ കാലങ്ങളനുസരിച്ച് തിരുസ്വരൂപത്തെ അണിയിക്കുന്ന വസ്ത്രത്തിൻ്റെ നിറങ്ങളും മാറുന്നു. വിറ്റെൽസ്ബാഹ് രാജകുടുംബത്തിലെ രാജകുമാരിമാർ അവരുടെ വിലയേറിയ വിവാഹ വസ്ത്രങ്ങൾ ആൾട്ടോട്ടിംഗിലെ മാതാവിനെ അണിയിക്കാനുള്ള ഗ്നാഡെൻറോക്ലിൻ ഉണ്ടാക്കാൻ നൽകിയിരുന്നു.
 
മാർപാപ്പയുടെ മോതിരം
 
ആൾട്ടോട്ടിംഗിന് നടത്തുള്ള മാർക്കറ്റ് ഇൽ (Marktl) ജനിച്ച ബനഡിക്ട് പതിനാറാമൻ പാപ്പ ചെറുപ്പം മുതൽ നിരവധി തവണ ഈ തീർത്ഥാടന കേന്ദ്രത്തിൽ സന്ദർശിക്കുക പതിവായിരുന്നു. ആൾട്ടോട്ടിംഗിലെ മരിയൻ തീർത്ഥാടന കേന്ദ്രത്തെ “ബവേറിയയുടെ ഹൃദയം, യുറോപ്പിലെ ഹൃദയങ്ങളിൽ ഒന്ന്” എന്നാണ് പിതാവ് വിശേഷിപ്പിച്ചത്.
2006 സെപ്റ്റംബർ പതിനൊന്നം തീയതി ബനഡിക്ട് പതിനാറാമൻ മാർപാപ്പ ആൾട്ടോട്ടിംഗ് സന്ദർശിച്ച അവസരത്തിൽ തനിക്കു പ്രിയപ്പെട്ട മെത്രാൻ മോതിരം പരിശുദ്ധ കന്യകാമറിയത്തിനു സമ്മാനമായി നൽകി. അന്നു മുതൽ കറുത്ത മാതാവിൻ്റെ കൈയ്യിലുള്ള അംശവടിയിൽ ഒരു പേപ്പൽ മോതിരവും സ്ഥാനം പിടിച്ചു. 1977 -ൽ മ്യൂണിക് ഫ്രൈസിംങ്ങ് അതിരൂപതയുടെ മെത്രനായി അഭിഷിക്തനായ അവസരത്തിൽ സഹോദരങ്ങളായ മരിയയും ജോർജും സമ്മാനമായി നൽകിയ സ്വർണ്ണ മോതിരമായിരുന്നു അത്.
 
മരിയൻ മാരത്തോൺ പ്രാർത്ഥന 28: നിയോഗം – മെത്രാന്മാർക്കും വൈദികർക്കും ഡീക്കന്മാർക്കും വേണ്ടി
 
1. തിരി കൊളുത്തുക
(പരിശുദ്ധ കന്യകാമറിയത്തിന്റെ തിരുസ്വരൂപത്തിന്റെ മുമ്പിലോ ഛായചിത്രത്തിന്റെ മുമ്പിലോ തിരി കത്തിച്ചുകൊണ്ട് ആരംഭിക്കുക).
 
2. തിരുവചന ഭാഗം വായന: ലൂക്കാ 18: 1-8 (വി. ലൂക്കാ സുവിശേഷം പതിനെട്ടാം അദ്ധ്യായം ഒന്നു മുതൽ എട്ടു വരെയുള്ള തിരുവചന ഭാഗം വായിക്കുക)
 
ഭഗ്‌നാശരാകാതെ എപ്പോഴും പ്രാര്ഥിക്കണം എന്നു കാണിക്കാന് യേശു അവരോട്‌ ഒരു ഉപമ പറഞ്ഞു: ദൈവത്തെ ഭയപ്പെടുകയോ മനുഷ്യരെ മാനിക്കുകയോ ചെയ്യാത്ത ഒരുന്യായാധിപന് ഒരു പട്ടണത്തില് ഉണ്ടായിരുന്നു. ആ പട്ടണത്തില് ഒരു വിധവയും ഉണ്ടായിരുന്നു. അവള് വന്ന്‌ അവനോട്‌, എതിരാളിക്കെതിരേ എനിക്കു നീതി നടത്തിത്തരണമേ എന്ന് അപേക്ഷിക്കുമായിരുന്നു. കുറേ നാളത്തേക്ക്‌ അവന് അത് ഗൗനിച്ചില്ല. പിന്നീട്‌, അവന് ഇങ്ങനെ ചിന്തിച്ചു: ഞാന് ദൈവത്തെ ഭയപ്പെടുകയോ മനുഷ്യരെ മാനിക്കുകയോ ചെയ്യുന്നില്ല. എങ്കിലും ഈ വിധവ എന്നെ ശല്യപ്പെടുത്തുന്നതു കൊണ്ട് ഞാന് അവള്ക്ക് നീതി നടത്തിക്കൊടുക്കും. അല്ലെങ്കില്, അവള് കൂടെക്കൂടെ വന്ന്‌ എന്നെ അസഹ്യപ്പെടുത്തും.
 
കര്ത്താവ്‌ പറഞ്ഞു: നീതിരഹിതനായ ആ ന്യായാധിപന് പറഞ്ഞതെന്തെന്ന്‌ ശ്രദ്ധിക്കുവിന്. അങ്ങനെയെങ്കില്, രാവും പകലും തന്നെ വിളിച്ചു കരയുന്ന തന്റെ തെരഞ്ഞെടുക്കപ്പെട്ടവര്ക്ക് ദൈവം നീതി നടത്തിക്കൊടുക്കുകയില്ലേ? അവിടുന്ന്‌ അതിനു കാലവിളംബം വരുത്തുമോ? അവര്ക്ക് വേഗം നീതി നടത്തിക്കൊടുക്കും എന്നു ഞാന് നിങ്ങളോടു പറയുന്നു. എങ്കിലും, മനുഷ്യപുത്രന് വരുമ്പോള് ഭൂമിയില് വിശ്വാസം കണ്ടെത്തുമോ?
 
3. വിചിന്തനം പങ്കുവയ്ക്കുക
(വചനവായനയ്ക്കു ശേഷം അല്പം നിശബ്ദ വിചിന്തനത്തിനുള്ള സമയം അനുവദിക്കുക. കാർമ്മികൻ താഴെ പറയുന്നതോ തത്തുല്യമായ മറ്റെതെങ്കിലും വ്യഖ്യാനം നൽകുക.)
 
പ്രിയ സഹോദരി സഹോദരന്മാരേ, പകർച്ചവ്യാധിയുടെ സമയം നമ്മുടെ ജീവിതത്തെ സാരമായി ബാധിച്ചു. പരീക്ഷണങ്ങളുടെ ഈ സമയം വിശ്വാസത്തിനു സാക്ഷ്യം വഹിക്കുവാനും പ്രത്യാശ പരിപോഷിപ്പിക്കുവാനും ആത്മീയവും ശാരീരികവുമായ കാരുണ്യപ്രവർത്തങ്ങളിൽ ഏർപ്പെടാനുമുള്ള നല്ല അവസരമാണ്.
 
പ്രിയപ്പെട്ടവരെ നഷ്ടപ്പെട്ടതിനാലും മരണസമയത്തും ശവസംസ്കാര ശുശ്രൂഷയിൽ പോലും അവരോടൊപ്പം സന്നിഹിതരായാൽ കഴിയാത്തതിന്റെ തീവ്രദുഃഖം നമ്മളിൽ ചിലരിൽ തങ്ങിനിൽക്കുന്നു. കുടുബപരവും സാമൂഹികവുമായ ബന്ധങ്ങൾ കഠിനമായ പരീക്ഷണങ്ങൾക്കു വിധേയമായി. സാമ്പത്തികപ്രതിസന്ധിയും തൊഴിലില്ലായ്മയും കുടുബങ്ങളുടെ ഭാവി അനിശ്ചിതത്വത്തിലാക്കുന്നു. ഈ അനുഭവങ്ങളിൽ, ആദിമ ക്രൈസ്തവസമൂഹം എന്തു ചെയ്തു എന്ന് അപ്പസ്തോലന്മാരുടെ പ്രവർത്തനങ്ങളിൽ മനോഹരമായി വിവരിച്ചിരിക്കുന്നു. “സഭ അവനുവേണ്ടി ദൈവത്തോടു തീക്ഷ്ണമായി പ്രാര്ഥിച്ചുകൊണ്ടിരുന്നു” (അപ്പ. പ്രവ. 12:5). നമ്മുടെ യാചനകൾ കേൾക്കാനായി ദൈവസന്നിധിയിലേക്കു നമ്മുടെ പ്രാർത്ഥനകൾ ഉയർത്താം.
 
4. പരിശുദ്ധ മാതാവിന്റെ സ്തുതിക്കായുള്ള ഒരു ഗാനം ആലപിക്കുക
 
5. ജപമാല പ്രാർത്ഥന ചൊല്ലുക
 
നമ്മൾ ഇപ്പോൾ കത്തിച്ച തിരി മഹാവ്യാധിയുടെ അവസാനത്തിനായി പ്രാർത്ഥിക്കാൻ നമ്മൾ വിളിക്കപ്പെട്ടിരിക്കുന്നു എന്നു ഓർമ്മപ്പെടുത്തുന്നു. ഈ പ്രാർത്ഥനാലയത്തിൽ ജാഗ്രതയോടെ വ്യാപരിക്കാൻ എല്ലാവരെയും ക്ഷണിക്കുന്നു. ശാരീരികമായി സന്നിഹിതമാകാൻ കഴിയില്ലങ്കിലും ആത്മീയമായി സ്വഭവനങ്ങളിലും ജോലിസ്ഥലങ്ങളിലും ഇടവക സമൂഹങ്ങളിലും ഇരുന്നുകൊണ്ട് ദൈവമാതാവായ പരിശുദ്ധ കന്യകാമറിയത്തോട് ഈ പരീക്ഷണകാലങ്ങൾ അതിജീവിക്കാനായി നമുക്കു മാദ്ധ്യസ്ഥ്യം തേടാം.
 
നമുക്കു പ്രാർത്ഥിക്കാം
ഓ പരിശുദ്ധ ദൈവമാതാവേ, ഞങ്ങൾ നിന്റെ സംരക്ഷണം തേടി നിന്റെ പക്കൽ വരുന്നു. ഓ ഭാഗ്യവതിയും മഹത്വപൂർണ്ണയുമായ കന്യകയേ, ഞങ്ങളുടെ ആവശ്യങ്ങളിൽ ഞങ്ങളുടെ അപേക്ഷകളെ നീ തള്ളിക്കളയരുതേ. എല്ലാ അപകടങ്ങളിൽ നിന്നും ഞങ്ങളെ വിടുവിപ്പിക്കണമേ. പിതാവും പുത്രനും പരിശുദ്ധാത്മാവുമായ സർവ്വേശ്വരാ എന്നേക്കും. ആമ്മേൻ
 
പ്രിയ സഹോദരി സഹോദരന്മാരെ, പരിശുദ്ധ പിതാവിനോടുള്ള ഐക്യത്തിൽ വലിയ പരീക്ഷണങ്ങളുടെ ഈ നാളുകളിൽ ആദിമ ക്രൈസ്തവസമൂഹങ്ങളെപ്പോലെ പരിശുദ്ധ കന്യകാമറിയത്തിന്റെ മദ്ധ്യസ്ഥതയിലുടെ നമ്മളെ അലട്ടുന്ന കോവിഡ് എന്ന മഹാവ്യാധി അവസാനിക്കുന്നതിനായി നമ്മുടെ പ്രാർത്ഥനകള ദൈവസന്നിധിയിലേക്ക് ഉയർത്താം.
ഇന്നേ ദിനം പ്രത്യേകമായി, എല്ലാ മെത്രാന്മാരെയും വൈദികരെയും ഡീക്കന്മാരെയും സമർപ്പിച്ച് പരിശുദ്ധ അമ്മയോട് നമുക്കു പ്രാർത്ഥിക്കാം. പരിശുദ്ധ കന്യകാമറിയത്തിന്റെ ചിത്രത്തിനു മുമ്പിൽ എരിയുന്ന ഈ തിരികൾ നമ്മുടെ അന്ധകാരത്തിന്റെ നിമിഷങ്ങളെ പ്രകാശിപ്പിക്കുകയും വെളിച്ചത്തിന്റെ പുതിയ അരുണോദയത്തിലേക്കു നമ്മുടെ ജീവിതങ്ങളെ പരിവർത്തനം ചെയ്യുകയും ചെയ്യട്ടെ.
 
(ഇപ്പോൾ നമുക്കു ജപമാല പ്രാർത്ഥന ജപിക്കാം. ജപമാലയുടെ അവസാനം ലുത്തിനിയാ, മരിയൻ ഗീതങ്ങൾ എന്നിവ പാടാവുന്നതാണ്.)
 
6. പ്രാർത്ഥന
 
ഓ പരിശുദ്ധ ദൈവ മാതാവേ, ഞങ്ങൾ നിന്റെ സംരക്ഷണം തേടിവരുന്നു. ലോകം മുഴുവൻ കഷ്ടപ്പാടുകൾക്കും ഉത്കണ്ഠകൾക്കും ഇരയായിരിക്കുന്ന ഈ ദാരുണ സാഹചര്യത്തിൽ ദൈവമാതാവും ഞങ്ങളുടെ അമ്മയുമായ നിന്റെ പക്കലേക്കു ഞങ്ങൾ ഓടിവരുകയും നിന്റെ സംരക്ഷണത്തിൽ അഭയം തേടുകയും ചെയ്യുന്നു.
 
കന്യകാമറിയമേ, കോറോണ വൈറസ് തീർക്കുന്ന പകർച്ചവ്യാധിക്കിടയിൽ നിന്റെ കരുണയുള്ള കണ്ണുകൾ ഞങ്ങളുടെ നേരേ തിരിക്കണമേ. അസ്വസ്ഥരായവരെയും പ്രിയപ്പെട്ടവരുടെ വേർപാടു മൂലം വിലപിക്കുന്നവരെയും ആശ്വസിപ്പിക്കണമേ. പ്രിയപ്പെട്ടവരുടെ രോഗം മൂലം ആകുലചിത്തരായിരിക്കുന്നവരോടും രോഗം പടരാതിരിക്കാൽ പ്രിയപ്പെട്ടവരിൽ നിന്നു അകന്നു നിൽക്കുന്നവരോടും നീ ചേർന്നുനിൽക്കണമേ. ഭാവിയെക്കുറിച്ചുള്ള അനിശ്ചിതത്വങ്ങളാലും സമ്പദ്വ്യവസ്ഥയും തൊഴിലില്ലായ്മയും ഉണ്ടാക്കുന്ന പ്രത്യാഘാതങ്ങളാൽ വിഷമിക്കുന്നവരിൽ നീ പ്രത്യശ നിറയ്ക്കണമേ.
 
ദൈവമാതാവും ഞങ്ങളുടെ അമ്മയുമായ മറിയമേ, ഈ മഹാവ്യാധി അവസാനിക്കുവാനും പ്രത്യാശയും സമാധാനവും പുതുതായി ഉദയം ചെയ്യുവാനും കരുണയുള്ള പിതാവായ ദൈവത്തോടു ഞങ്ങൾക്കു വേണ്ടി പ്രാർത്ഥിക്കണമേ. രോഗികളുടെയും അവരോടു ബന്ധപ്പെട്ട കുടുംബങ്ങളുടെയും ആശ്വാസത്തിനും അവരുടെ ഹൃദയങ്ങളിൽ ആത്മവിശ്വാസത്തിന്റെയും പ്രത്യാശയുടെയും കിരണങ്ങൾ വിരിയുവാനും കാനായിൽ നിന്റെ ദിവ്യസുതനോട് അപേക്ഷിച്ചതുപോലെ ഞങ്ങൾക്കു വേണ്ടിയും പ്രാർത്ഥിക്കണമേ. മറ്റുള്ളവരുടെ ജീവൻ രക്ഷിക്കാനായി അപകടസാധ്യതകളൾ നിറഞ്ഞ അത്യാഹിതവിഭാഗങ്ങളിൽ മുൻനിരയിൽ ശുശ്രൂഷ ചെയ്യുന്ന ഡോക്ടർമാരെയും നേഴ്സുമാരെയും ആരോഗ്യപ്രവർത്തകരെയും സന്നദ്ധപ്രവർത്തകരെയും സംരക്ഷിക്കണമേ. അവരുടെ വീരോചിതമായ പരിശ്രമങ്ങളെ സഹായിക്കുകയും അവർക്കു ആരോഗ്യവും മഹാമനസ്കതയും ശക്തിയും നൽകുകയും ചെയ്യണമേ.
 
ദുഃഖിതരുടെ ആശ്വാസമായ മറിയമേ, ദുരിതത്തിലകപ്പെട്ടിരിക്കുന്ന നിന്റെ എല്ലാ മക്കളെയും ആശ്വസിപ്പിക്കുകയും ദൈവം തന്റെ സർവ്വശക്തമായ കരം നീട്ടി ഭയാനകമായ ഈ പകർച്ചവ്യാധിയിൽ നിന്നു മോചനം നൽകുന്നതിനായി ഞങ്ങൾക്കു വേണ്ടി പ്രാർത്ഥിക്കുകയും ചെയ്യണമേ, അതുവഴി സാധാരണ ജീവിതത്തിലേക്കു ഞങ്ങൾ മടങ്ങിവരട്ടെ. രക്ഷയുടെയും പ്രത്യാശയുടെയും അടയാളമായി ഞങ്ങളുടെ ജീവിതയാത്രയിൽ വിളങ്ങിശോഭിക്കുന്ന മാധുര്യവും സ്നേഹവും കരുണയും നിറഞ്ഞ പരിശുദ്ധ അമ്മേ, ഞങ്ങളെത്തന്നെ നിനക്കു ഞങ്ങൾ ഭരമേല്പിക്കുന്നു. ആമ്മേൻ.
 
7. സമാപന പ്രാർത്ഥന
 
പ്രിയ സഹോദരി സഹോദരന്മാരെ, ഇന്നേ ദിനം പരിശുദ്ധ കന്യകാമറിയത്തിന്റെ കരങ്ങളിലൂടെ എല്ലാ മെത്രാന്മാരെയും വൈദികരെയും ഡീക്കന്മാരെയും നാം ദൈവത്തിനു സമർപ്പിച്ചുവല്ലോ. നമ്മുടെ യാചനകൾ അവിടുന്നു ശ്രവിക്കുകയും അവ സാധിച്ചുതരുകയും ചെയ്യട്ടെ.
 
8. എത്രയും ദയയുള്ള മാതാവേ എന്ന പ്രാർത്ഥന
 
എത്രയും ദയയുള്ള മാതാവേ/ നിന്റെ സങ്കേതത്തില് ഓടിവന്ന്‌‌/ നിന്റെ സഹായം തേടി/ നിന്റെ മാദ്ധ്യസ്ഥം അപേക്ഷിച്ചവരില്/ ഒരുവനെയെങ്കിലും/ നീ ഉപേക്ഷിച്ചതായി കേട്ടിട്ടില്ല/ എന്ന്‌ നീ ഓര്ക്കണമെ. കന്യകളുടെ രാജ്ഞിയായ കന്യകേ/ ദയയുള്ള മാതാവേ/ ഈ വിശ്വാസത്തില് ധൈര്യപ്പെട്ട്/ നിന്റെ തൃപ്പാദത്തിങ്കല്/ ഞാന് അണയുന്നു. വിലപിച്ചു കണ്ണുനീര് ചിന്തി/ പാപിയായ ഞാന്/ നിന്റെ ദയാധിക്യത്തെ കാത്തുകൊണ്ട്‌/ നിന്റെ സന്നിധിയില്/ നില്ക്കുന്നു. അവതരിച്ച വചനത്തിന് മാതാവേ/ എന്റെ അപേക്ഷ ഉപേക്ഷിക്കാതെ/ ദയാപൂര്വ്വം കേട്ടരുളേണമെ, ആമ്മേന്.
 
ഫാ. ജയ്സൺ കുന്നേൽ MCBS
Advertisements

Author of the Content: Fr. Jaison Kunnel MCBS, Ludwig-Maximilians-Universität München
Source: – Official Facebook Page: https://www.facebook.com/jaison.alex.16/

Categories: Saints

Tagged as: ,

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s