പരിശുദ്ധ അമ്മയുടെ അമലോത്ഭവ ദിനത്തിൽ ഡിസംബർ 8 ന് ഉച്ചയ്ക്ക് 12 മണിമുതൽ 1 മണി വരെയുള്ള സമയത്തു വളരെയധികം ദൈവകൃപ ചൊരിയപ്പെടുമെന്നും കഠിന ഹൃദയരായ പാപികൾക്ക് പോലും ദൈവകൃപയുടെ സ്പർശനം ലഭിയ്ക്കുമെന്നും ഈ കൃപയുടെ മണിക്കൂറിൽ നിത്യപിതാവിന് സ്വീകാര്യമായ വിധത്തിൽ എന്ത് ചോദിച്ചാലും അവ അനുവദിച്ചു നല്കപ്പെടുമെന്നും പരിശുദ്ധ അമ്മ ഇറ്റലിയിലെ പിയേറിന ഗില്ലിയ്ക്കു സന്ദേശം നൽകി.

പരിശുദ്ധ അമ്മയുടെ സന്ദേശം അനുസരിച്ചു നമ്മൾ ചെയ്യേണ്ടത് :

1. ഡിസംബർ എട്ടിന് ഉച്ചക്ക് 12 മണി മുതൽ 1 മണി വരെയുള്ള സമയം പ്രാർത്ഥനയിൽ ചിലവഴിക്കാം.
2. വീട്ടിലോ ജോലിസ്ഥലത്തോ ദൈവാലയത്തിലോ ഈ സമയം പ്രാർത്ഥനയിൽ നിന്നും നമ്മുടെ ശ്രദ്ധ തിരിക്കാൻ സാധ്യത ഉള്ള എല്ലാത്തിൽ നിന്നും എല്ലാ തിരക്കുകളിൽ നിന്നും അകന്നു ദൈവവുമായി ഐക്യത്തിൽ ആയിരിക്കാം. ( ഈ സമയങ്ങളിൽ മറ്റാരോടും സംസാരിക്കാതെ യും മൊബൈൽ ഫോണും മറ്റും ഉപയോഗിക്കാതെയും പ്രാർത്ഥനയിൽ തടസമുണ്ടാകുന്നവയിൽ നിന്നും ഒഴിഞ്ഞു മാറാം)
3. കൈകൾ വിരിച്ചു പിടിച്ചു അൻപത്തിഒന്നാം സങ്കീർത്തനം 3 പ്രാവശ്യം ചൊല്ലി പ്രാർത്ഥന ആരംഭിക്കാം.
4. ഈശോയുടെ പീഡാനുഭവങ്ങളെ പറ്റി ധ്യാനിച്ചും, ജപമാല ചൊല്ലിയും, തന്റേതായ രീതിയിൽ പ്രാർത്ഥിച്ചും ദൈവത്തെ സ്തുതിച്ചും, പരിശുദ്ധാത്മാവ് പ്രേരിപ്പിക്കുന്ന പാട്ടുകൾ പാടിയും, സങ്കീർത്തനങ്ങൾ ധ്യാനിച്ചും കൃപയുടെ ഈ മണിക്കൂർ ചിലവഴിക്കാം.

“ഇവര്‍ ഏകമനസ്സോടെ യേശുവിന്റെ അമ്മയായ മറിയത്തോടും മറ്റു സ്‌ത്രീകളോടും അവന്റെ സഹോദരരോടുമൊപ്പം പ്രാര്‍ത്ഥനയില്‍ മുഴുകിയിരുന്നു.”
(അപ്പ. പ്രവര്‍ത്തനങ്ങള്‍ 1 : 14)