🕊️🕊️🕊️ വിശുദ്ധ കാർലോ അക്യൂട്ടീസിനോടുള്ള കുട്ടികളുടെ പ്രാർത്ഥന 🕊️🕊️🕊️

പിതാവിൻ്റെയും പുത്രൻ്റെയും പരിശുദ്ധാത്മാവിൻ്റെയും നാമത്തിൽ, ആമേൻ.

ഈശോയുടെ ഏറ്റവും പ്രിയപ്പെട്ട വിശുദ്ധ കാർലോ അക്യൂട്ടീസ്,
ബാല്യം മുതൽക്കേ അതിയായ ദൈവസ്നേഹത്തിൽ വളർന്നു വരുവാൻ അവിടുന്ന് നിനക്ക് കൃപ നല്കിയല്ലോ. അനുദിനം ദിവ്യബലിയിൽ പങ്കുചേർന്നും, വിശുദ്ധ കുർബാന സ്വീകരിച്ചും നീ ഈശോയെ സ്വന്തമാക്കിയതുപോലെ ഞങ്ങളും വിശുദ്ധ ബലിയിലും കുർബാന സ്വീകരണത്തിലും താല്പര്യമുള്ളവരായി വളർന്നുവരാൻ ഞങ്ങൾക്കുവേണ്ടി പ്രാർത്ഥിക്കണമേ. വിശുദ്ധ കുർബാനയെ സ്വർഗത്തിലേക്കുള്ള ഹൈവേ ആക്കി മാറ്റുവാൻ ഞങ്ങളെയും സഹായിക്കണമേ.

രോഗത്തിലും സഹനത്തിലും നീ ഈശോയെ മഹത്വപ്പെടുത്തിയതുപോലെ ഞങ്ങളും ദൈവത്തെ മഹത്വപ്പെടുത്താൻ ഇടയാകട്ടെ. ഇന്റർനെറ്റും സാങ്കേതിക വിദ്യയും ദൈവത്തിന്റെ മഹത്വത്തിനായി ഉപയോഗിച്ചവനേ,
ഞങ്ങൾക്കും അതേ വിശ്വാസവും പവിത്രതയും നല്ല ദൈവത്തിൽ നിന്നും വാങ്ങി തരേണമേ. ഡിജിറ്റൽ ലോകത്തിൽ വഴിതെറ്റാതെ,
നന്മയും സത്യവും പങ്കുവയ്ക്കാൻ ഞങ്ങളെയും പ്രചോദിപ്പിക്കണമേ.

പഠനത്തിൽ ഉത്സാഹവും ഏകാഗ്രതയും ലഭിക്കാനും,
സത്യവും ജ്ഞാനവും അന്വേഷിക്കുന്ന മനസ്സ് ലഭിക്കാനും
ഞങ്ങൾക്കുവേണ്ടി നീ പ്രാർത്ഥിക്കണമേ. പരീക്ഷകളിലും ബുദ്ധിമുട്ടുകളിലും ധൈര്യം അവലംബിക്കാനും; ഞങ്ങളുടെ അറിവും കഴിവും മറ്റുള്ളവരുടെ നന്മക്കും വളർച്ചക്കുംവേണ്ടി പ്രയോജനപ്പെടുത്താൻ ഞങ്ങളെയും പഠിപ്പിക്കണമേ.

ഓ പ്രിയമുള്ള വിശുദ്ധ കാർലോ അക്യൂട്ടീസ്,
യുവാക്കളുടെ മാതൃകയും ഡിജിറ്റൽ ലോകത്തിന്റെ വിശുദ്ധനുമായ നീ, ദൈവസന്നിധിയിൽ ഞങ്ങൾക്കുവേണ്ടി അപേക്ഷിക്കണമേ. ഈശോയോടും പരിശുദ്ധ മറിയത്തോടും കൂടി
ഞങ്ങൾ എല്ലായ്പ്പോഴും ദൈവസ്നേഹത്തിൽ ജീവിക്കാനായി
നിന്റെ മാദ്ധ്യസ്ഥം ഞങ്ങളെ സഹായിക്കട്ടേ.

പിതാവിൻ്റെയും പുത്രൻ്റെയും പരിശുദ്ധാത്മാവിൻ്റെയും നാമത്തിൽ, ആമേൻ. ✨