യുദ്ധം, രോഗം, തടവ് – അവയുടെ സ്വാധീനം ഫ്രാൻസീസിൻ്റെ ജീവിതത്തിൽ

1. ശാരീരികവും മാനസികവുമായ വേദന

തടവിലിരിക്കുമ്പോൾ ഫ്രാൻസിസ് ഗുരുതരമായി രോഗബാധിതനായി. മലേറിയയോ ക്ഷയരോഗമോ ആയിരിക്കാമെന്ന് ചിലർ കരുതി. ചില ദിവസങ്ങളിൽ സഹതടവുകാർ പോലും അദ്ദേഹം ജീവിച്ചിരിക്കില്ലെന്ന് വിചാരിച്ചു. മോചിതനായ ശേഷം, അതീവ ക്ഷീണിതനായി ഫ്രാൻസിസ് വീട്ടിലേക്ക് മടങ്ങി. അമ്മയുടെ സ്നേഹപരിപാലനത്തിലൂടെ അവൻ ശാരീരിക ആരോഗ്യം പതുക്കെ വീണ്ടെടുത്തു. എങ്കിലും, രോഗവും തടവും അദ്ദേഹത്തിന്റെ മനസ്സിലും ഹൃദയത്തിലും ആഴത്തിലുള്ള മുറിവുകൾ ഉണ്ടാക്കി. ശരീരം സുഖം പ്രാപിച്ചുവെങ്കിലും, ഉള്ളിലെ വേദന ശക്തമായി തുടരുകയായിരുന്നു. യുദ്ധത്തിന്റെ ഭീകരതയും തടവിലെ ദുരനുഭവങ്ങളും ഫ്രാൻസിസിനെ ഭയം, ദുഃഖം, ആശയക്കുഴപ്പം എന്നിവയിലേക്കു നയിച്ചു.

2. മോചനത്തിനുശേഷമുള്ള പോരാട്ടങ്ങൾ

ഫ്രാൻസിസിന്റെ വേദന ശാരീരികതയെക്കാൾ മാനസികവും വികാരാത്മകവുമായിരുന്നു. ഇന്നത്തെ ഭാഷയിൽ പറഞ്ഞാൽ, അദ്ദേഹം വിഷാദത്തിലോ മാനസിക ആഘാതത്തിലോ ആയിരുന്നുവെന്ന് പറയാം. രക്തപാകമായ യുദ്ധത്തിന്റെ ഓർമ്മകളും തടവുഗാർഡുകളുടെ ക്രൂരതയും തണുത്തും ഇരുണ്ടതുമായ തടവറയും ദീർഘകാലം അദ്ദേഹത്തെ പിന്തുടർന്നു. പല ദിവസങ്ങളും അദ്ദേഹം തന്റെ മുറിയിൽ ഒറ്റയ്ക്കും മൗനത്തിലും ചെലവഴിച്ചു. കുടുംബവ്യാപാരത്തിലേക്ക് തിരിച്ചുവരണമെന്ന് ആഗ്രഹിച്ചിരുന്ന പിതാവ് അദ്ദേഹത്തോട് ക്ഷമയില്ലാതെ പെരുമാറി. എന്നാൽ ഫ്രാൻസിസിന് സുഖം പ്രാപിക്കാൻ സമയം ആവശ്യമായിരുന്നു. ഫ്രാൻസീസ് ഇതുവരെ വിശുദ്ധനായി മാറിയിരുന്നില്ല; അതിനാൽ ഉള്ളിലെ വേദനകൾ ഉടൻ മറികടക്കാൻ അദ്ദേഹത്തിനായില്ല.

3. സുഖപ്രാപ്തിക്ക് സമയം ആവശ്യമാണ്

ഫ്രാൻസിസിന്റെ ജീവിതം നമ്മെ ഓർമ്മിപ്പിക്കുന്നത് സുഖപ്രാപ്തി ഒരുനാൾ കൊണ്ടുണ്ടാകില്ല എന്നതാണ്. വിശുദ്ധിയിലേക്കുള്ള വിളിയുള്ളവർക്കുപോലും പോരാട്ടങ്ങളും വളർച്ചയും ആവശ്യമാണ്. നമ്മളിൽ പലരും ഇന്നും പഴയ വേദനകളുടെ ഭാരമേറ്റു ജീവിക്കുന്നു. പ്രിയപ്പെട്ടവരുടെ നഷ്ടമോ കുടുംബപ്രശ്നങ്ങളോ മറ്റേതെങ്കിലും ദുഃഖകരമായ അനുഭവങ്ങളോ നമ്മുടെ ഹൃദയത്തിൽ ആഴത്തിലുള്ള മുറിവുകൾ ഉണ്ടാക്കിയിരിക്കാം. ദൈവം ഈ വേദനയെ മനസ്സിലാക്കുന്നു, അവൻ നമ്മുടെ കൂടെ നടക്കുന്നു. സമയം, കൃപ, ക്രിസ്തുവിലേക്കുള്ള വിശ്വാസം എന്നിവയിലൂടെ സുഖപ്രാപ്തി വരും. പ്രത്യാശ കൈവിടരുത്. വിശ്വസ്തതയോടും ക്ഷമയോടും കൂടി മുന്നോട്ട് പോകുമ്പോൾ, നമ്മുടെ വേദന തന്നെ ശക്തിയുടെ ഉറവിടമാകും. അതിലൂടെ ദൈവം നമ്മെ അവൻ ആഗ്രഹിക്കുന്ന വ്യക്തികളായും വിശുദ്ധന്മാരായും രൂപപ്പെടുത്തും.

✍ ഫാ. ജയ്സൺ കുന്നേൽ MCBS