കുഞ്ഞുങ്ങളെ ലഭിക്കുവാൻ ദമ്പതികളുടെ പ്രാർത്ഥന

ജീവന്റെ ദാതാവും, അനുഗ്രഹങ്ങളുടെ ഉറവിടവുമായ സ്വർഗ്ഗീയ പിതാവേ, ഞങ്ങളുടെ ദൈവമേ,
ഇന്ന് ഞങ്ങൾ ഭർത്താവും ഭാര്യയും ആയി അങ്ങേ സന്നിധിയിൽ നിൽക്കുന്നു. ഞങ്ങളുടെ ഹൃദയത്തിലെ ഏറ്റവും വലിയ ആഗ്രഹം —
ഒരു കുഞ്ഞിനെ, അങ്ങയിൽ നിന്ന് വരദാനമായി ലഭിക്കുവാൻ —
സമർപ്പിച്ചുകൊണ്ട് അങ്ങയോട് അപേക്ഷിക്കുന്നു.

കർത്താവേ, അങ്ങയുടെ വചനത്തിൽ പറയുന്ന പോലെ:
“കര്‍ത്താവിന്റെ ദാനമാണ്‌ മക്കള്‍, ഉദരഫലം ഒരു സമ്മാനവും.”
(സങ്കീര്‍ത്തനങ്ങള്‍ 127: 3)

ഞങ്ങൾക്കും ഈ ദൈവദാനം നല്കണമേ.
ഞങ്ങളുടെ അഭിമാനത്തിനല്ല, വിശ്വാസത്തിലും സ്നേഹത്തിലും വിശുദ്ധിയിലും കുഞ്ഞുങ്ങളെ വളർത്തി അവിടുത്തെ നാമത്തെ മഹത്വപ്പെടുത്തുവാനാണ് ഞങ്ങളുടെ മോഹം.

അബ്രാഹത്തിന്റെയും ഇസഹാക്കിന്റെയും യാക്കോബിന്റെയും ദൈവമേ, അവിടുന്ന് സാറയുടെ പ്രാർത്ഥന കേട്ടുവല്ലോ.
സാറാ പറഞ്ഞു: “എനിക്കു സന്തോഷിക്കാന്‍ ദൈവം വക നല്‍കിയിരിക്കുന്നു. ഇതു കേള്‍ക്കുന്ന വരൊക്കെ എന്നെച്ചൊല്ലി ചിരിക്കും.” (ഉല്‍പത്തി 21 : 6)

റാഹേലിന്റെ കരച്ചിൽ അങ്ങ് കേട്ടുവല്ലോ: “എനിക്ക് മക്കളെ തരണമേ; ഇല്ലെങ്കിൽ ഞാൻ മരിക്കും.” (ഉല്പത്തി 30:1)

ഹന്നയുടെ കണ്ണീർ അങ്ങ് നീക്കിയല്ലോ: “കര്‍ത്താവേ, ഈ ദാസിയുടെ സങ്കടം കണ്ട്‌ അങ്ങ്‌ എന്നെ അനുസ്‌മരിക്കണമേ! അങ്ങയുടെ ദാസിയെ വിസ്‌മരിക്കരുതേ! ” (1 സാമുവല്‍ 1 : 11)

എലിസബത്ത് സന്തോഷത്തോടെ പറഞ്ഞുവല്ലോ:
“മനുഷ്യരുടെ ഇടയില്‍ എനിക്കുണ്ടായിരുന്ന അപ മാനം നീക്കിക്കളയാന്‍ കര്‍ത്താവ്‌ എന്നെ കടാക്‌ഷിച്ച്‌ എനിക്ക്‌ ഇതു ചെയ്‌തു തന്നിരിക്കുന്നു”. (ലൂക്കാ 1 : 25)

ഇങ്ങനെ, കണ്ണീർ ചൊരിഞ്ഞവരെ അങ്ങ് അനുഗ്രഹിച്ച് സന്തോഷം നിറച്ചതുപോലെ, ഞങ്ങളുടെ പ്രാർത്ഥനയും കേട്ടു അനുഗ്രഹിക്കണമേ.

പരിശുദ്ധ കന്യകാമറിയമേ, ലോകത്തിന്റെ രക്ഷിതാവിനെ ഗർഭത്തിൽ ധരിച്ചവളേ, ഞങ്ങൾക്കായി അപേക്ഷിക്കണമേ.

വിശുദ്ധ യൗസേപ്പേ, കുടുംബങ്ങളുടെ രക്ഷകനേ, ഞങ്ങൾക്കായി പ്രാർത്ഥിക്കണമേ.

വിശുദ്ധ ജോവാക്കിമേ, വിശുദ്ധ അന്നാമ്മേ, ദൈവത്തോട് കുഞ്ഞിനായി അപേക്ഷിച്ച് മറിയത്തെ വരദാനമായി സ്വീകരിച്ച വിശുദ്ധ മാതാപിതാക്കളേ, ഞങ്ങളുടെ കൂടെ നിന്നു ഞങ്ങൾക്കുവേണ്ടി അപേക്ഷിക്കണമേ.

സ്വർഗ്ഗീയ പിതാവേ, അങ്ങയുടെ തിരുവിഷ്ടപ്രകാരം ഞങ്ങൾക്കും കുഞ്ഞുങ്ങളെ ലഭിക്കണമേ. അവരെ ലഭിച്ചാൽ അവർ ആദ്യം അങ്ങയുടേതാണെന്ന് ഞങ്ങൾ എല്ലായ്പ്പോഴും ഓർക്കട്ടെ.
അവരെ വിശ്വാസത്തിലും പ്രത്യാശയിലും സ്നേഹത്തിലും വളർത്തുവാൻ ഞങ്ങൾക്കു കൃപയും ജ്ഞാനവും നല്കണമേ.
അങ്ങയുടെ വചനത്തിൽ പറയുന്ന പോലെ: മാതാവിന്റെ ഉദരത്തില്‍ നിനക്കു രൂപം നല്‍കുന്നതിനു മുന്‍പേ ഞാന്‍ നിന്നെ അറിഞ്ഞു; ജനിക്കുന്നതിനു മുന്‍പേ ഞാന്‍ നിന്നെ വിശുദ്‌ധീകരിച്ചു; ജനതകള്‍ക്കു പ്രവാചകനായി ഞാന്‍ നിന്നെ നിയോഗിച്ചു. (ജറെമിയാ 1: 5) “ദൈവത്തിന്‌ ഒന്നും അസാധ്യമല്ല.” (ലൂക്കാ 1 : 37)

ദൈവമേ, അങ്ങ് ഞങ്ങൾക്കായ് ഒരുക്കിയിരിക്കുന്ന സമയത്തിൽ ഞങ്ങൾ വിശ്വസിച്ചുകൊണ്ട് ഞങ്ങളുടെ ഭാവിയും കുടുംബവും
നിന്റെ കൈകളിൽ ഏല്പിക്കുന്നു. ഞങ്ങളുടെ ഈ പ്രാർത്ഥന ദയാപൂർവം കേട്ട് ഞങ്ങളെ ആശീർവദിക്കണമേ. പിതാവും പുത്രനും പരിശുദ്ധാത്മാവുമായ സർവ്വേശ്വരാ എന്നേക്കും, ആമേൻ.