വിശുദ്ധ കതേരി ടെകാക്വിത: മഞ്ഞിൽ മുട്ടുകുത്തി ഈശോയെ കാത്തിരുന്ന വിശുദ്ധ

പുലർച്ചെ നാല് മണി. കനത്ത തണുപ്പ്. എല്ലായിടത്തും മഞ്ഞ് വീണുകിടക്കുന്നു. മനുഷ്യർ ഇപ്പോഴും ഉറക്കത്തിലാണ്. എന്നാൽ ഒരു യുവതി ദൈവാലയത്തിന്റെ അടഞ്ഞ വാതിലിന് മുമ്പിൽ മുട്ടുകുത്തി പ്രാർത്ഥിച്ചുകൊണ്ടിരിക്കുന്നു. അവൾക്ക് തണുപ്പ് പ്രശ്നമല്ല. മഞ്ഞ് അവളെ തടയുന്നില്ല. അവൾ കാത്തിരിക്കുന്നത് ഒരു മനുഷ്യനെയല്ല, ദിവ്യകാരുണ്യത്തിൽ സന്നിഹിതനായ യേശുവിനെയാണ്.

ആ യുവതിയാണ് വിശുദ്ധ കതേരി ടെകാക്വിത (1656–1680) – “മോഹോക്കുകളുടെ ലില്ലി” എന്നറിയപ്പെടുന്ന വിശുദ്ധ. ഇന്നത്തെ അമേരിക്കയിലെ ന്യൂയോർക്കിന് സമീപമുള്ള മോഹോക്ക് ഗോത്രത്തിൽ ജനിച്ച അവളുടെ അമ്മ ക്രിസ്ത്യാനിയായ അൽഗോൺക്വിൻ വംശജയും പിതാവ് ക്രിസ്തുമതം സ്വീകരിക്കാത്ത മോഹോക്ക് ഗോത്രത്തലവനുമായിരുന്നു. നാലാം വയസ്സിൽ വസൂരി ബാധിച്ച് മാതാപിതാക്കളെ നഷ്ടപ്പെട്ട അവളുടെ മുഖത്ത് രോഗത്തിന്റെ പാടുകൾ അവശേഷിക്കുകയും കാഴ്ചശക്തി ക്ഷയിക്കുകയും ചെയ്തു.

ഇരുപതാം വയസ്സിൽ അവൾ കത്തോലിക്കാ വിശ്വാസം സ്വീകരിച്ച് മാമോദീസ സ്വീകരിച്ചു. അതിനുശേഷം കുടുംബത്തിൽ നിന്നും ഗോത്രത്തിൽ നിന്നും കടുത്ത എതിർപ്പും പീഡനവും നേരിട്ടെങ്കിലും അവളുടെ വിശ്വാസം തളർന്നില്ല. ഒടുവിൽ കാനഡയിലെ കാഹ്നവാകെ എന്ന ക്രൈസ്തവ ഗ്രാമത്തിലേക്ക് താമസം മാറി. അവിടെ കന്യകാവ്രതം സ്വീകരിച്ച അവൾ പ്രാർത്ഥനയിലും ത്യാഗത്തിലും പരിശുദ്ധ കന്യകാമറിയത്തോടുള്ള സ്നേഹത്തിലും, എല്ലാറ്റിനുമുപരിയായി ദിവ്യകാരുണ്യഭക്തിയിലും വളർന്നു. അവളുടെ ഹൃദയത്തിലെ ഏറ്റവും വലിയ നിധി വിശുദ്ധ ദിവ്യകാരുണ്യത്തിലെ യേശുവായിരുന്നു.

ദിവ്യകാരുണ്യത്തോടുള്ള അവളുടെ സ്നേഹം അസാധാരണമായിരുന്നു. എല്ലാ ദിവസവും കഴിയുന്നത്ര മൂന്ന് വിശുദ്ധ കുർബാനകളിൽ അവൾ പങ്കെടുത്തു. വിശുദ്ധ കുർബാന സ്വീകരിക്കുന്നതിന് മുമ്പ് രണ്ട് മണിക്കൂർ ഹൃദയത്തെ ഒരുക്കുകയും, കുർബാന സ്വീകരിച്ച ശേഷം രണ്ട് മണിക്കൂർ യേശുവിന് നന്ദി പറഞ്ഞ് അവിടുത്തെ സാന്നിധ്യത്തിൽ ചെലവഴിക്കുകയും ചെയ്തു. കൂടാതെ ദിവസത്തിൽ പലതവണ ദിവ്യകാരുണ്യ സന്നിധിയിൽ എത്തി യേശുവിനെ സന്ദർശിക്കുമായിരുന്നു.

അവളുടെ ജീവിതത്തെ നയിച്ച ഒരു പ്രാർത്ഥനയുണ്ടായിരുന്നു:

“ദൈവത്തിന് ഏറ്റവും പ്രസാദകരമായത് എന്താണെന്ന് എന്നെ ആരാണ് പഠിപ്പിക്കുക? അത് ഞാൻ ചെയ്യട്ടെ.”

ഈ പ്രാർത്ഥന വെറും വാക്കുകളായിരുന്നില്ല; അത് അവളുടെ ജീവിതരീതിയായിരുന്നു. സ്വന്തം ഇഷ്ടത്തേക്കാൾ ദൈവഹിതത്തെയാണ് അവൾ തിരഞ്ഞെടുത്തത്. സ്വന്തം സൗകര്യത്തേക്കാൾ യേശുവിന്റെ സന്തോഷമാണ് അവൾ അന്വേഷിച്ചത്.

വിശുദ്ധ കതേരി നമ്മോടും ഒരു ചോദ്യം ചോദിക്കുന്നു. വിശുദ്ധ കുർബാനയ്ക്ക് നാം എങ്ങനെ എത്തുന്നു? നമ്മുടെ ഹൃദയം യേശുവിനെ സ്വീകരിക്കാൻ ഒരുക്കുന്നുണ്ടോ? കുർബാന സ്വീകരിച്ച ശേഷം അവിടുത്തോട് നന്ദി പറയാൻ സമയം കണ്ടെത്തുന്നുണ്ടോ? അതോ എല്ലാം തിരക്കിട്ട് അവസാനിപ്പിച്ച് ലോകത്തിന്റെ തിരക്കുകളിലേക്ക് മടങ്ങുകയാണോ?

ദിവ്യകാരുണ്യത്തിലെ യേശു കതേരിയെ വിശുദ്ധിയുടെയും സ്നേഹത്തിന്റെയും ത്യാഗത്തിന്റെയും മനോഹരമായ സാക്ഷിയാക്കി. വെറും 24-ാം വയസ്സിൽ, 1680 ഏപ്രിൽ 17-ന് അവൾ ദൈവസന്നിധിയിലേക്ക് വിളിക്കപ്പെട്ടു. 2012-ൽ വിശുദ്ധയായി പ്രഖ്യാപിക്കപ്പെട്ട അവൾ ഇന്ന് പരിസ്ഥിതിയുടെയും പരിസ്ഥിതി സംരക്ഷണത്തിന്റെയും മധ്യസ്ഥ വിശുദ്ധയായി ആദരിക്കപ്പെടുന്നു. അവളുടെ തിരുനാൾ ജൂലൈ 14-നാണ് സഭ ആഘോഷിക്കുന്നത്.

വിശുദ്ധ കതേരി ടെകാക്വിതയുടെ ജീവിതം നമ്മെ പഠിപ്പിക്കുന്നത് ഒറ്റ കാര്യമാണ്: യേശുവിനെ സ്നേഹിക്കുന്ന ഹൃദയം ഒരിക്കലും സമയമോ ത്യാഗമോ കണക്കാക്കുകയില്ല. മഞ്ഞിൽ മുട്ടുകുത്തി യേശുവിനെ കാത്തിരുന്ന അവളുടെ സ്നേഹം, നമ്മുടെ ഹൃദയങ്ങളിലും ദിവ്യകാരുണ്യത്തോടുള്ള ഒരിക്കലും അണയാത്ത ദാഹമായി ജ്വലിക്കട്ടെ.

✍ ഫാ . ജയ്സൺ കുന്നേൽ MCBS