കുരിശിന്റെ പുകഴ്ചയുടെ തിരുനാൾ കഴിഞ്ഞ് പിറ്റേന്നാൾ, സെപ്റ്റംബർ 15-ന് ആഗോളസഭ വ്യാകുലമാതാവിന്റെ തിരുനാൾ ആഘോഷിക്കുന്നു. കാൽവരിയിലെ കുരിശിൻചുവട്ടിൽ നിശ്ശബ്ദയായി നിന്ന പരിശുദ്ധ കന്യകാമറിയത്തിന്റെ ഹൃദയത്തിലേക്ക് നമ്മെ ക്ഷണിക്കുന്ന ദിനമാണിത്.

വ്യാകുലമാതാവിന്റെ തിരുനാൾ നമ്മോട് പറയുന്ന ഏറ്റവും വലിയ സന്ദേശം ഇതാണ്: സഹിക്കുന്ന മനുഷ്യരോടൊപ്പം നിൽക്കുന്ന ദൈവസ്നേഹത്തിന്റെ നിത്യമായ മാതൃവാത്സല്യമാണ് മറിയം. അവളുടെ ജീവിതം ദുഃഖങ്ങളിൽ നിന്ന് വിമുക്തമായിരുന്നില്ല. സന്തോഷത്തിലും വേദനയിലും, പ്രതീക്ഷയിലും അനിശ്ചിതത്വത്തിലും, ബെത്‌ലഹേമിലെ പുൽത്തൊട്ടിൽ മുതൽ കാൽവരിയിലെ കുരിശുവരെ അവൾ തന്റെ പുത്രനായ ഈശോയോടൊപ്പം നടന്നു.

മറിയത്തിന്റെ ജീവിതത്തെ മൂന്ന് വാക്കുകളിൽ ചുരുക്കാം:

അവൾ നിന്നു.She Stayed

അവൾ വിശ്വസിച്ചു. She trusted

അവൾ സ്നേഹിച്ചു. She loved

മറിയത്തിന്റെ ഏഴു വ്യാകുലങ്ങൾ

സഭാപാരമ്പര്യത്തിൽ പരിശുദ്ധ കന്യകാമറിയത്തിന്റെ ഹൃദയത്തെ ആഴത്തിൽ മുറിവേൽപ്പിച്ച ഏഴു വ്യാകുലങ്ങളെ നാം പ്രത്യേകമായി ധ്യാനിക്കുന്നു.

1. ശിമയോന്റെ പ്രവചനം — പ്രതീക്ഷയുടെ നടുവിലെ കുരിശ്

യേശുവിനെ ദൈവാലയത്തിൽ സമർപ്പിച്ചപ്പോൾ ശിമയോൻ മറിയത്തോട് പറഞ്ഞു:

“നിന്റെ ഹൃദയത്തിലൂടെ ഒരു വാൾ കടന്നുപോകും.”

(ലൂക്കാ 2:34-35)

ദൈവത്തിന്റെ രക്ഷാപദ്ധതിയിൽ തിരഞ്ഞെടുക്കപ്പെട്ട അമ്മയായ മറിയം, തന്റെ പുത്രന്റെ ജീവിതത്തിൽ കുരിശ് ഉണ്ടാകുമെന്ന് ആദ്യമേ കേട്ടു. സന്തോഷത്തിന്റെ നിമിഷത്തിൽ തന്നെ വരാനിരിക്കുന്ന വേദനയുടെ സൂചന അവൾക്ക് ലഭിച്ചു. എങ്കിലും അവൾ ദൈവത്തിന്റെ പദ്ധതിയിൽ വിശ്വസിച്ചു.

2. ഈജിപ്തിലേക്കുള്ള പലായനം — സുരക്ഷിതത്വം നഷ്ടപ്പെട്ട അമ്മ

ഹേറോദേസിന്റെ ഭീഷണിയിൽ യേശുവിനെയും കൂട്ടി ഈജിപ്തിലേക്ക് പലായനം ചെയ്യേണ്ടിവന്നു (മത്തായി 2:13-14).

സ്വന്തം നാടും വീടും ഉപേക്ഷിച്ച് അനിശ്ചിതമായ യാത്രയിലേക്ക് പോകേണ്ടിവന്ന മറിയത്തിന്റെ വേദന, ഇന്ന് വീടും നാടും നഷ്ടപ്പെട്ട് അഭയാർത്ഥികളായി കഴിയുന്ന അനേകം അമ്മമാരുടെ വേദനയുമായി ചേർന്നുനിൽക്കുന്നു.

3. ബാലനായ യേശുവിനെ ദൈവാലയത്തിൽ കാണാതായത് — തിരച്ചിലിന്റെ വേദന

പന്ത്രണ്ടു വയസ്സുള്ള യേശുവിനെ ജറുസലേം ദൈവാലയത്തിൽ കാണാതായപ്പോൾ മറിയവും യൗസേപ്പും മൂന്ന് ദിവസം അവനെ അന്വേഷിച്ചു (ലൂക്കാ 2:43-45).

ദൈവത്തെ സ്നേഹിക്കുന്നവരുടെ ജീവിതത്തിലും ചിലപ്പോൾ ദൈവം അകന്നുപോയതുപോലെ തോന്നാം. പ്രാർത്ഥനയ്ക്ക് മറുപടി ലഭിക്കാത്തതുപോലെയും ദൈവസാന്നിധ്യം അനുഭവിക്കാനാകാത്തതുപോലെയും തോന്നുന്ന നിമിഷങ്ങൾ ഉണ്ടാകാം. അത്തരം സമയങ്ങളിൽ മറിയത്തിന്റെ ജീവിതം നമ്മോട് പറയുന്നത്: തിരച്ചിൽ അവസാനിപ്പിക്കരുത്.

4. ഈശോ കുരിശ് വഹിക്കുന്നത് — മകന്റെ വേദന കണ്ട അമ്മ

കാൽവരിയിലേക്കുള്ള വഴിയിൽ യേശു കുരിശ് വഹിച്ചുകൊണ്ടുപോയി (യോഹന്നാൻ 19:17).

മകന്റെ വേദന കാണുന്ന അമ്മയുടെ ഹൃദയം എത്രമാത്രം തകർന്നിരിക്കണം! എന്നാൽ മറിയം അവനെ ഉപേക്ഷിച്ചില്ല.

അവൾ നിന്നു.

5. ഈശോയുടെ കുരിശുമരണം — സ്നേഹത്തിന്റെ പരമമായ പരീക്ഷണം

യേശു കുരിശിൽ മരിക്കുമ്പോൾ മറിയം കുരിശിൻചുവട്ടിൽ നിന്നു (യോഹന്നാൻ 19:18-30).

യേശുവിന്റെ വേദന ഇല്ലാതാക്കാൻ അവൾക്ക് കഴിഞ്ഞില്ല. കുരിശ് മാറ്റാനും അവൾക്ക് കഴിഞ്ഞില്ല. എന്നാൽ അവന്റെ അവസാന നിമിഷംവരെ അവൾ കൂടെയുണ്ടായിരുന്നു.

മറിയത്തിന്റെ വിശ്വാസം വേദനയുടെ അഭാവമായിരുന്നില്ല; വേദനയുടെ നടുവിലും ദൈവത്തിൽ ഉറച്ചുനിൽക്കാനുള്ള ശക്തിയായിരുന്നു.

6. ഈശോയുടെ തിരുശരീരം മാതാവിന്റെ മടിയിൽ — ഒരു അമ്മയുടെ തകർന്ന ഹൃദയം

കുരിശിൽനിന്ന് ഇറക്കിയ യേശുവിന്റെ തിരുശരീരം മറിയത്തിന്റെ മടിയിൽ കിടത്തി.

ഒരിക്കൽ ബെത്‌ലഹേമിൽ കുഞ്ഞായ യേശുവിനെ സ്നേഹത്തോടെ കൈകളിൽ എടുത്ത അതേ അമ്മ ഇപ്പോൾ നിർജീവനായ പുത്രന്റെ ശരീരം മടിയിൽ ചേർത്തുപിടിക്കുന്നു.

വേദനയുടെ ആഴത്തിലും സ്നേഹം അവസാനിച്ചില്ല.

7. ഈശോയുടെ കല്ലറ — നിശ്ശബ്ദമായ പ്രത്യാശ

യേശുവിനെ കല്ലറയിൽ അടക്കം ചെയ്തു (യോഹന്നാൻ 19:39-42).

കല്ലറയുടെ വാതിൽ അടഞ്ഞപ്പോൾ മനുഷ്യന്റെ കണ്ണിൽ എല്ലാം അവസാനിച്ചതുപോലെ തോന്നി. എന്നാൽ മറിയത്തിന്റെ ഹൃദയത്തിലെ വിശ്വാസം അവസാനിച്ചില്ല. പുനരുത്ഥാനത്തിന്റെ മഹത്വം പൂർണ്ണമായി മനസ്സിലാക്കാത്തപ്പോഴും അവൾ ദൈവത്തിൽ ആശ്രയിച്ചു.

അവൾ വിശ്വസിച്ചു.

വ്യാകുലതയിൽ നിന്ന് വിശ്വാസത്തിലേക്ക്

മറിയത്തിന്റെ ജീവിതം നമ്മെ പഠിപ്പിക്കുന്നത് വളരെ പ്രധാനപ്പെട്ട ഒരു സത്യമാണ്:

വിശ്വാസമുള്ളവന്റെ ജീവിതത്തിൽ കുരിശ് ഉണ്ടാകില്ല എന്നല്ല ക്രൈസ്തവ വിശ്വാസം; കുരിശിന്റെ നടുവിലും ദൈവത്തെ ഉപേക്ഷിക്കാതിരിക്കാൻ കഴിയുന്നതാണ് വിശ്വാസം.

മറിയത്തിന് എല്ലാം മനസ്സിലായിരുന്നില്ല. പക്ഷേ അവൾ ദൈവത്തെ വിശ്വസിച്ചു.

നമ്മുടെ ജീവിതത്തിലും ചില ചോദ്യങ്ങൾക്ക് ഉടൻ ഉത്തരം ലഭിക്കില്ല. രോഗം, മരണം, വേർപാട്, പരാജയം, കുടുംബപ്രശ്നങ്ങൾ, ഏകാന്തത, സാമ്പത്തിക ബുദ്ധിമുട്ടുകൾ, പ്രിയപ്പെട്ടവരുടെ വേദന — ഇവയ്ക്കുമുമ്പിൽ നാം പലപ്പോഴും ചോദിക്കുന്നു:

“ദൈവമേ, എന്തുകൊണ്ട്?”

മറിയം നമ്മെ പഠിപ്പിക്കുന്നത് എല്ലാ ചോദ്യങ്ങൾക്കും ഉത്തരം കിട്ടിയതിനുശേഷം മാത്രം വിശ്വസിക്കണമെന്നല്ല. ഉത്തരം മനസ്സിലാകാത്തപ്പോഴും ദൈവത്തിൽ ആശ്രയിക്കാനാണ്.

വ്യാകുലമാതാവിനോടുള്ള ഭക്തിയുടെ ആത്മീയ വാഗ്ദാനങ്ങൾ

വിശുദ്ധ അൽഫോൻസ് ലിഗോരി തന്റെ The Glories of Mary എന്ന ഗ്രന്ഥത്തിൽ മറിയത്തിന്റെ വ്യാകുലങ്ങളോടുള്ള ഭക്തിയെക്കുറിച്ച് വിശദീകരിക്കുന്നു. ഈ ഭക്തിയുമായി ബന്ധപ്പെട്ട് പാരമ്പര്യത്തിൽ ഈശോ നൽകുന്നതായി പറയപ്പെടുന്ന നാല് വാഗ്ദാനങ്ങൾ ഇപ്രകാരമാണ്:

1. മറിയത്തിന്റെ വ്യാകുലങ്ങളെ ബഹുമാനിക്കുകയും അവളിൽ അഭയം തേടുകയും ചെയ്യുന്നവർക്ക് മരണത്തിനു മുമ്പ് യഥാർത്ഥ അനുതാപത്തിന്റെ കൃപ ലഭിക്കും.

2. കഷ്ടതകളിലും പ്രത്യേകിച്ച് മരണസമയത്തും ഈശോ അവരെ സംരക്ഷിക്കും.

3. ഈശോയുടെ പീഡാനുഭവത്തിന്റെ ഓർമ്മ അവരുടെ ഹൃദയങ്ങളിൽ ആഴത്തിൽ പതിയുകയും അതിന് സ്വർഗീയ പ്രതിഫലം ലഭിക്കുകയും ചെയ്യും.

4. അവരെ മറിയത്തിന്റെ മാതൃപരിപാലനത്തിന് ഏൽപ്പിക്കുകയും, അവരുടെ ആത്മരക്ഷയ്ക്ക് അനുയോജ്യമായ കൃപകൾ മറിയത്തിന്റെ മാധ്യസ്ഥത്തിലൂടെ ലഭിക്കുകയും ചെയ്യും.

ഇവയെ യാന്ത്രികമായ ഉറപ്പുകളായി കാണാതെ, ക്രിസ്തുവിന്റെ പീഡാനുഭവത്തെയും മറിയത്തിന്റെ മാതൃമാധ്യസ്ഥത്തെയും ആഴത്തിൽ ധ്യാനിക്കാനുള്ള ഒരു ഭക്തിപാരമ്പര്യമായി മനസ്സിലാക്കുന്നതാണ് ഉചിതം.

മറിയത്തിന്റെ വ്യാകുലങ്ങളെ ബഹുമാനിക്കുന്നവർക്കുള്ള ഏഴു കൃപകൾ

സ്വീഡനിലെ വിശുദ്ധ ബ്രിജിറ്റുമായി ബന്ധപ്പെട്ട ആത്മീയ പാരമ്പര്യത്തിൽ, മറിയത്തിന്റെ ഏഴു വ്യാകുലങ്ങളെ ധ്യാനിക്കുന്നവർക്ക് പരിശുദ്ധ അമ്മയുടെ മാധ്യസ്ഥത്തിലൂടെ ലഭിക്കുന്നതായി പറയപ്പെടുന്ന ഏഴു പ്രത്യേക കൃപകളും പ്രചരിച്ചിട്ടുണ്ട്.

1. മറിയത്തിന്റെ വ്യാകുലങ്ങളെ ബഹുമാനിക്കുന്ന കുടുംബങ്ങളിൽ സമാധാനം.

2. ദൈവിക രഹസ്യങ്ങളെ കൂടുതൽ ആഴത്തിൽ മനസ്സിലാക്കാനുള്ള ബോധോദയം.

3. വേദനകളിൽ ആശ്വാസവും ജീവിതത്തിലെ ജോലികളിൽ സഹായവും.

4. ദൈവഹിതത്തിനും ആത്മാവിന്റെ വിശുദ്ധീകരണത്തിനും വിരുദ്ധമല്ലാത്ത ആവശ്യങ്ങളിൽ മറിയത്തിന്റെ മാധ്യസ്ഥം.

5. ആത്മീയ പോരാട്ടങ്ങളിൽ സംരക്ഷണം.

6. മരണസമയത്ത് മറിയത്തിന്റെ പ്രത്യേക മാതൃസഹായം.

7. മറിയത്തിന്റെ കണ്ണുനീരിന്റെയും വ്യാകുലങ്ങളുടെയും ഭക്തി പ്രചരിപ്പിക്കുന്നവർക്ക് ദൈവത്തിന്റെ കരുണയിലും നിത്യജീവിതത്തിലുമുള്ള പ്രത്യേക സഹായം.

ഈ പാരമ്പര്യത്തിന്റെ ഹൃദയസന്ദേശം ഇതാണ്: മറിയത്തിന്റെ വ്യാകുലങ്ങളെ ധ്യാനിക്കുന്നത് നമ്മെ മറിയത്തിലൂടെ ഈശോയുടെ കുരിശിനോടും അവന്റെ സ്നേഹത്തോടും കൂടുതൽ അടുപ്പിക്കുന്നു.

നമ്മുടെ വേദനകളിൽ കൂടെയിരിക്കുന്ന അമ്മ

വ്യാകുലമാതാവ് ഒരു പഴയ ചരിത്രസംഭവത്തിന്റെ ഓർമ്മ മാത്രമല്ല. ഇന്നും സഹിക്കുന്ന മനുഷ്യരുടെ കൂടെയിരിക്കുന്ന അമ്മയാണ്.

മകന്റെ രോഗത്തെക്കുറിച്ച് കരയുന്ന അമ്മയിൽ,

മക്കളെക്കുറിച്ച് ആശങ്കപ്പെടുന്ന മാതാപിതാക്കളിൽ,

പ്രിയപ്പെട്ട ഒരാളെ നഷ്ടപ്പെട്ടവരിൽ,

ഏകാന്തത അനുഭവിക്കുന്നവരിൽ,

ജീവിതത്തിന്റെ കുരിശുമായി പോരാടുന്നവരിൽ,

പ്രാർത്ഥിച്ചിട്ടും മറുപടി ലഭിക്കുന്നില്ലെന്ന് തോന്നുന്നവരിൽ

വ്യാകുലമാതാവിന്റെ ഹൃദയത്തിന്റെ പ്രതിധ്വനി നമുക്ക് കേൾക്കാം.

അവൾ നമ്മുടെ വേദനയെ ദൂരെയിരുന്ന് നോക്കുന്ന അമ്മയല്ല.

അവൾ കുരിശിന്റെ ചുവട്ടിൽ നിന്ന അമ്മയാണ്.

അതുകൊണ്ടുതന്നെ നമ്മുടെ കണ്ണുനീർ അവൾക്ക് അന്യമായതല്ല.

STAY. TRUST. LOVE.

വ്യാകുലമാതാവിന്റെ തിരുനാൾ ഇന്ന് നമ്മെ മൂന്ന് ചെറിയ വാക്കുകൾ പഠിപ്പിക്കുന്നു:

STAY — നിൽക്കുക

കുരിശ് വന്നപ്പോൾ ദൈവത്തിൽനിന്ന് ഓടിപ്പോകരുത്.

TRUST — വിശ്വസിക്കുക

എല്ലാം മനസ്സിലാകാത്തപ്പോഴും ദൈവത്തിന്റെ സ്നേഹത്തിൽ ആശ്രയിക്കുക.

LOVE — സ്നേഹിക്കുക

വേദന നമ്മുടെ ഹൃദയത്തെ കഠിനമാക്കാതെ കൂടുതൽ കരുണയുള്ളതാക്കട്ടെ.

മറിയം കുരിശിൽനിന്ന് ഓടിപ്പോയില്ല.

അവൾ യേശുവിനെ ഉപേക്ഷിച്ചില്ല.

അവൾ തന്റെ സ്നേഹം പിൻവലിച്ചില്ല.

She stayed.

She trusted.

She loved.

അതുകൊണ്ടാണ് വ്യാകുലമാതാവ് നമ്മുടെ പ്രത്യാശയുടെ അമ്മയാകുന്നത്.

വ്യാകുലമാതാവേ, ഞങ്ങൾക്കുവേണ്ടി പ്രാർത്ഥിക്കണമേ.

✍ ഫാ. ജയ്സൺ കുന്നേൽ MCBS