സ്വർഗ്ഗാരോപണ വിചിന്തനങ്ങൾ 5

മറിയം പ്രാർത്ഥിക്കുന്ന അമ്മ

“ഇവര്‍ ഏകമനസ്സോടെ യേശുവിന്‍റെ അമ്മയായ മറിയത്തോടും മറ്റു സ്ത്രീകളോടും അവന്‍റെ സഹോദരരോടുമൊപ്പം പ്രാര്‍ഥനയില്‍ മുഴുകിയിരുന്നു.” അപ്പ. പ്രവര്‍ത്തനങ്ങള്‍ 1 : 14.

ഈ തിരുവചനം ആദിമസഭയുടെ ഹൃദയത്തിൽ മറിയത്തിനുള്ള സ്ഥാനം വെളിപ്പെടുത്തുന്നു. പുത്രന്റെ സ്വർഗ്ഗാരോഹണത്തിനുശേഷം അപ്പോസ്തലന്മാർ ഭയത്തോടും അനിശ്ചിതത്വത്തോടും കൂടി ഒളിച്ചിരുന്നപ്പോൾ, മറിയം അവരുടെ മധ്യത്തിൽ പ്രാർത്ഥനയുടെ അമ്മയായി കൂടെനിൽക്കുന്നു.

മറിയത്തിന്റെ ജീവിതം മുഴവൻ പ്രാർത്ഥനയായിരുന്നു. മംഗള വാർത്താ നിമിഷത്തിൽ “നിന്റെ വാക്ക് എന്നിൽ നിറവേറട്ടെ” എന്ന് പറഞ്ഞത് മുതൽ കുരിശിൻ ചുവട്ടിൽ നിശബ്ദമായി സ്വയം സമർപ്പണം ചെയ്യുന്നതുവരെ അവളുടെ ജീവിതം നിരന്തരമായ പ്രാർത്ഥനയായിരുന്നു. വിശുദ്ധ ലൂയി മോൺഫോർട്ടിന്റെ വാക്കുകളിൽ: “മറിയം പ്രാർത്ഥനയിൽ ജനിച്ചു, പ്രാർത്ഥനയിൽ ജീവിച്ചു, പ്രാർത്ഥനയിൽ മരിച്ചു.”

“ഏകമനസ്സോടെ പ്രാർത്ഥനയിൽ മുഴുകിയിരുന്നു” എന്ന വാക്യം പ്രാർത്ഥനയുടെ സാമുഹിക മാനത്തെ എടുത്തുകാണിക്കുന്നു. മറിയത്തിന്റെ സാന്നിധ്യം അപ്പോസ്തലന്മാരെ ഐക്യപ്പെടുത്തി. പരസ്പരം വ്യത്യസ്തരായ, വ്യത്യസ്ത പശ്ചാത്തലത്തിൽനിന്നുള്ള അവർ മറിയത്തിന്റെ നേതൃത്വത്തിൽ ഏകഹൃദയരായി പ്രാർത്ഥിച്ചു. വിശുദ്ധ അംബ്രോസിയൂസിന്റെ വാക്കുകളിൽ: “മറിയം സഭയുടെ മാതൃകയാണ്, കാരണം അവൾ പ്രാർത്ഥനയിൽ വിശ്വാസികളെ ഐക്യപ്പെടുത്തുന്നു.”

പെന്തക്കോസ്തുദിനത്തിൽ പരിശുദ്ധാത്മാവിന്റെ വരവിനുള്ള തയ്യാറെടുപ്പിൽ മറിയത്തിന്റെ പ്രാർത്ഥന അത്യന്താപേക്ഷിതമായിരുന്നു. മറിയത്തിന്റെ ഉദരത്തിൽ പരിശുദ്ധാത്മാവിന്റെ ശക്തിയാൽ ദൈവപുത്രൻ അവതരിച്ചതുപോലെ, അവളുടെ പ്രാർത്ഥനയുടെ നേതൃത്വത്തിൽ പരിശുദ്ധാത്മാവ് സഭയിൽ ഇറങ്ങിവന്നു. വിശുദ്ധ ജോൺ പോൾ രണ്ടാമന്റെ വാക്കുകളിൽ: “മറിയം പെന്തക്കുസ്തായുടെ അമ്മയാണ്, സഭയുടെ ജനനത്തിൽ അവൾ പ്രാർത്ഥനയിലൂടെ സഹകരിച്ചു.”. കാനായിലെ വിവാഹത്തിൽ “വീഞ്ഞില്ല” എന്ന് പറഞ്ഞു മനുഷ്യരുടെ ആവശ്യങ്ങൾ പുത്രന്റെ ശ്രദ്ധയിൽപ്പെടുത്തിയ അവൾ ഇന്നു സഭയുടെ ആവശ്യങ്ങൾക്കായി പ്രാർത്ഥിക്കുന്നു. വിശുദ്ധ ബെർണാഡിൻ പറയുന്നതുപോലെ: “മറിയത്തിന്റെ പ്രാർത്ഥന എപ്പോഴും ഫലപ്രദമാണ്, കാരണം അത് മാതൃസ്നേഹത്തിൽ അടിയുറച്ചതാണ്.” ഇന്നത്തെ തിരക്കേറിയ ലോകത്ത് മറിയത്തിന്റെ പ്രാർത്ഥനാജീവിതം നമുക്കു മാർഗദർശിയാണ്. സാങ്കേതികവിദ്യയുടെയും വ്യാകുലതയുടെയും കാലത്ത് നിശബ്ദമായ പ്രാർത്ഥനയുടെ ആവശ്യകത കൂടുതലാണ്. മറിയത്തിന്റെ പ്രാർത്ഥന വ്യക്തിഗതമായിരുന്നില്ല, മറിച്ച് സമൂഹത്തോടൊപ്പമുള്ളതായിരുന്നു. നസറത്തിലെ കുടുംബത്തിൽ ജോസഫിനോടും യേശുവിനോടുമൊപ്പം, ജറുസലേമിൽ അപ്പോസ്തലന്മാരോടൊപ്പം. ഇത് കുടുംബപ്രാർത്ഥനയുടെ പ്രാധാന്യത്തെ എടുത്തുകാണിക്കുന്നു.

മറിയത്തിന്റെ പ്രാർത്ഥനാജീവിതം നമ്മെ പഠിപ്പിക്കുന്നത് പ്രാർത്ഥന കേവലം വാക്കുകളല്ല, മറിച്ച് ജീവിതരീതിയാണ് എന്നാണ്. നിരന്തരമായ ദൈവസാന്നിധ്യത്തിൽ ജീവിക്കുക, സമൂഹത്തോടൊപ്പം പ്രാർത്ഥിക്കുക, മറ്റുള്ളവർക്കുവേണ്ടി മധ്യസ്ഥത വഹിക്കുക – ഇവയെല്ലാം മറിയത്തിന്റെ പ്രാർത്ഥനാവിദ്യാലയത്തിലെ പാഠങ്ങളാണ്. “പ്രാർത്ഥനയുടെ അമ്മ” എന്ന മറിയത്തിന്റെ പദവി അവളുടെ ജീവിതത്തിൽനിന്ന് ഉരുത്തിരിഞ്ഞതാണ്. നമ്മുടെ പ്രാർത്ഥനകളിലും അവൾ നമ്മോടു കൂടെയുണ്ട്, അവൾ നമ്മെ പുത്രനിലേക്കു നയിക്കുന്നു.

ഫാ. ജയ്സൺ കുന്നേൽ MCBS