ഫാത്തിമായിലെ പരിശുദ്ധ അമ്മയുടെ അവസാന ദർശനവും സൂര്യാത്ഭുതവും

1917 ഒക്ടോബർ 13: സൂര്യൻ നൃത്തം ചെയ്ത ദിവസം

ചരിത്രത്തിൽ ഒരിക്കലും വിസ്മരിക്കാനാവാത്ത ഒരു ദിവസമാണ് 1917 ഒക്ടോബർ 13. അന്നാണ് പോർച്ചുഗലിലെ ഫാത്തിമയിൽ ആയിരക്കണക്കിന് ആളുകളുടെ സാന്നിധ്യത്തിൽ സൂര്യാത്ഭുതം സംഭവിച്ചതായി സാക്ഷ്യപ്പെടുത്തപ്പെട്ടത്. ആ അത്ഭുതസംഭവം പോർച്ചുഗലിനെ മാത്രമല്ല, ലോകത്തെത്തന്നെ വിസ്മയിപ്പിച്ചു. ഫാത്തിമയിലെ സൂര്യാത്ഭുതത്തിന്റെ ദിനമായി ഒക്ടോബർ 13 ഇന്നും ഓർമിക്കപ്പെടുന്നു. അക്കാലത്തെ പോർച്ചുഗീസ് പത്രങ്ങളുടെ മുഖപ്പേജുകൾപോലും ഈ അസാധാരണ സംഭവത്തിന്റെ വാർത്തകൾകൊണ്ട് നിറഞ്ഞിരുന്നു.

മുമ്പത്തെ ദർശനങ്ങളിലെന്നപോലെ, ലൂസിയ, ഫ്രാൻസിസ്കോ, ജസീന്ത എന്നീ മൂന്നു ഇടയക്കുട്ടികൾ കോവ ദ ഇരിയയിൽ (Cova da Iria) എത്തിയപ്പോൾ ആദ്യം ഒരു പ്രകാശത്തിന്റെ പ്രതിഫലനം കണ്ടു. തുടർന്ന് അവിടെയുണ്ടായിരുന്ന ചെറിയ കരുവേലകത്തിന്റെ മുകളിൽ പരിശുദ്ധ കന്യകാമറിയം പ്രത്യക്ഷപ്പെട്ടു.

ലൂസിയ പരിശുദ്ധ അമ്മയോട് ചോദിച്ചു: “അമ്മേ, എന്നിൽനിന്ന് എന്താണ് ആഗ്രഹിക്കുന്നത്?”

പരിശുദ്ധ അമ്മ മറുപടി പറഞ്ഞു: “എന്റെ ബഹുമാനാർഥം ഇവിടെ ഒരു ചാപ്പൽ പണിയണമെന്ന് ഞാൻ ആഗ്രഹിക്കുന്നു. ഞാൻ ജപമാല രാജ്ഞിയാണ്. എല്ലാ ദിവസവും ജപമാല ചൊല്ലുന്നത് നിങ്ങൾ തുടരണം. യുദ്ധം അവസാനിക്കുകയും സൈനികർ ഉടൻതന്നെ തങ്ങളുടെ ഭവനങ്ങളിലേക്ക് മടങ്ങുകയും ചെയ്യും.”

തുടർന്ന് ലൂസിയ പല കാര്യങ്ങൾക്കുവേണ്ടി പരിശുദ്ധ അമ്മയോട് അപേക്ഷിച്ചു. രോഗികളുടെ സൗഖ്യത്തിനും പാപികളുടെ മാനസാന്തരത്തിനും വേണ്ടി അവൾ പ്രാർത്ഥിച്ചു.

പരിശുദ്ധ അമ്മ പറഞ്ഞു: “ചിലർക്ക് സൗഖ്യം ലഭിക്കും; മറ്റുചിലർക്ക് ലഭിക്കുകയില്ല. അവർ തങ്ങളുടെ ജീവിതം തിരുത്തുകയും പാപങ്ങൾക്ക് മാപ്പ് ചോദിക്കുകയും വേണം.”

ഇതു പറഞ്ഞശേഷം പരിശുദ്ധ അമ്മയുടെ മുഖത്ത് കൂടുതൽ ദുഃഖം നിറഞ്ഞു. അവൾ ഗൗരവപൂർവം ഇപ്രകാരം പറഞ്ഞു:

“നമ്മുടെ കർത്താവായ ദൈവത്തെ ഇനി വേദനിപ്പിക്കരുത്. അവിടുന്ന് ഇതിനകംതന്നെ വളരെയധികം വേദനിപ്പിക്കപ്പെട്ടിരിക്കുന്നു.”

ഈ വാക്കുകൾ കേൾക്കുന്ന ഓരോ വിശ്വാസിയുടെയും ഹൃദയത്തിൽ ആഴത്തിൽ പതിയേണ്ടതാണ്. പാപത്തിൽനിന്ന് പിന്തിരിയാനും മാനസാന്തരത്തിലൂടെ ദൈവത്തിലേക്ക് മടങ്ങിവരാനും പരിശുദ്ധ അമ്മ നമ്മെ ക്ഷണിക്കുന്നു.

ജപമാല രാജ്ഞിയുടെ അവസാന ദർശനം

തുടർന്ന് പരിശുദ്ധ അമ്മ തന്റെ കരങ്ങൾ തുറന്നു. അവയിൽനിന്നുള്ള പ്രകാശം സൂര്യനിലേക്ക് പ്രതിഫലിച്ചു. അമ്മ സ്വർഗത്തിലേക്ക് ഉയരുമ്പോഴും ആ പ്രകാശം സൂര്യത്തിലേക്ക് വ്യാപിക്കുന്നതായി ദർശകർ കണ്ടു.

ആ നിമിഷം ലൂസിയ ഉറക്കെ വിളിച്ചുപറഞ്ഞു:

“സൂര്യനെ നോക്കൂ!”

പരിശുദ്ധ അമ്മ ആകാശത്തിന്റെ അനന്തതയിൽ അപ്രത്യക്ഷയായതിനു പിന്നാലെ, ദർശകരുടെ കണ്ണുകൾക്കുമുന്നിൽ മൂന്നു ദൃശ്യങ്ങൾ തുടർച്ചയായി പ്രത്യക്ഷപ്പെട്ടു. ജപമാലയിലെ സന്തോഷത്തിന്റെ രഹസ്യങ്ങളും പിന്നീട് ദുഃഖത്തിന്റെ രഹസ്യങ്ങളും ഒടുവിൽ മഹിമയുടെ രഹസ്യങ്ങളും പ്രതീകാത്മകമായി ഈ ദർശനങ്ങളിൽ പ്രതിഫലിച്ചു. മൂന്നു ദൃശ്യങ്ങളും കണ്ടത് ലൂസിയ മാത്രമായിരുന്നു. ഫ്രാൻസിസ്കോയും ജസീന്തയും ആദ്യത്തെ ദൃശ്യം മാത്രമാണ് കണ്ടത്.

ആദ്യമായി സൂര്യന്റെ സമീപത്ത് ഉണ്ണീശോയോടും വിശുദ്ധ യൗസേപ്പിതാവിനോടും കൂടിയ പരിശുദ്ധ അമ്മ പ്രത്യക്ഷപ്പെട്ടു. അതായിരുന്നു തിരുക്കുടുംബത്തിന്റെ ദർശനം. പരിശുദ്ധ അമ്മ വെള്ളവസ്ത്രവും നീല മേലങ്കിയും ധരിച്ചിരുന്നു. വിശുദ്ധ യൗസേപ്പിതാവും വെള്ളവസ്ത്രത്തിലായിരുന്നു. ഉണ്ണീശു ഇളം ചുവപ്പുനിറത്തിലുള്ള വസ്ത്രം ധരിച്ചിരുന്നു.

വിശുദ്ധ യൗസേപ്പിതാവ് ജനക്കൂട്ടത്തെ ആശീർവദിച്ചുകൊണ്ട് മൂന്നു പ്രാവശ്യം കുരിശടയാളം വരച്ചു. ഉണ്ണീശുവും അതുപോലെ ജനങ്ങളെ ആശീർവദിച്ചു.

തുടർന്ന് വ്യാകുലമാതാവിന്റെയും കാൽവരിയിലേക്കുള്ള പീഡാസഹനയാത്രയിൽ അത്യധികം വേദന അനുഭവിക്കുന്ന ഈശോയുടെയും ദർശനം ഉണ്ടായി. ഈശോ ജനങ്ങളെ ആശീർവദിച്ചുകൊണ്ട് കുരിശടയാളം വരച്ചു. വ്യാകുലമാതാവിന്റെ ഹൃദയത്തിൽ വാൾ തറച്ചിരിക്കുന്നതായി ഈ ദർശനത്തിൽ കണ്ടില്ല. ലൂസിയയ്ക്ക് ഈശോയുടെ ശരീരത്തിന്റെ മുകൾഭാഗം മാത്രമേ കാണാൻ കഴിഞ്ഞുള്ളൂ.

അവസാനമായി അതിമഹനീയമായ ഒരു ദർശനത്തിൽ, സ്വർഗത്തിന്റെയും ഭൂമിയുടെയും രാജ്ഞിയായി കിരീടം ധരിച്ച പരിശുദ്ധ കർമലമാതാവ് ഉണ്ണീശുവിനെ കൈകളിൽ വഹിച്ചുകൊണ്ട് പ്രത്യക്ഷപ്പെട്ടു.

ഈ ദൃശ്യങ്ങൾ ദർശകരുടെ കണ്ണുകൾക്കുമുന്നിൽ തെളിഞ്ഞുകൊണ്ടിരിക്കുമ്പോൾ, ഏകദേശം അമ്പതിനായിരം മുതൽ എഴുപതിനായിരം വരെ ആളുകൾ സൂര്യാത്ഭുതത്തിന് സാക്ഷ്യം വഹിച്ചുകൊണ്ടിരുന്നു.

സൂര്യൻ നൃത്തം ചെയ്ത അത്ഭുതനിമിഷങ്ങൾ

അന്നേദിവസം പരിശുദ്ധ അമ്മയുടെ ദർശനം നടക്കുന്നതിനിടെ മഴ പെയ്തുകൊണ്ടിരുന്നു. ഭൂമിയും വഴികളും ആളുകളുടെ വസ്ത്രങ്ങളും മഴയിൽ നനഞ്ഞിരുന്നു. എന്നാൽ ലൂസിയയും പരിശുദ്ധ അമ്മയും തമ്മിലുള്ള സംഭാഷണം അവസാനിച്ചപ്പോൾ, അമ്മ സ്വർഗത്തിലേക്ക് ഉയരുന്ന നിമിഷം, ആകാശത്തിലെ മേഘങ്ങൾ പെട്ടെന്ന് മാറി. അപ്പോഴാണ് ലൂസിയ “സൂര്യനെ നോക്കൂ!” എന്ന് വിളിച്ചുപറഞ്ഞത്.

ആകാശത്ത് ഒരു വലിയ വെള്ളിത്തളികപോലെ സൂര്യൻ പ്രത്യക്ഷപ്പെട്ടു. അതിന്റെ പ്രകാശം അത്യധികം തീവ്രമായിരുന്നെങ്കിലും സാധാരണ സൂര്യനെ നോക്കുമ്പോഴുണ്ടാകുന്നതുപോലെ കണ്ണുകൾക്ക് അസഹ്യമായിരുന്നില്ലെന്ന് ദൃക്സാക്ഷികൾ വിവരിച്ചു. ഈ അസാധാരണ കാഴ്ച ഏതാനും നിമിഷങ്ങൾ നീണ്ടുനിന്നു.

പെട്ടെന്ന് സൂര്യൻ ചലിക്കാൻ തുടങ്ങി. ആകാശത്ത് അഗ്നിചക്രം കറങ്ങുന്നതുപോലെ അത് അതിവേഗം സ്വയം കറങ്ങുന്നതായി ആളുകൾക്ക് അനുഭവപ്പെട്ടു. കുറച്ചുനേരം നിശ്ചലമായതുപോലെ തോന്നിയ സൂര്യൻ വീണ്ടും അതിവേഗത്തിൽ കറങ്ങാൻ തുടങ്ങി.

അതിനുശേഷം സൂര്യന്റെ അരികുകൾ കടുംചുവപ്പുനിറം കൈവരിച്ചു. ആകാശത്തിലൂടെ ഒരു ചുഴലിപോലെ അത് നീങ്ങുന്നതായി തോന്നി. ചുവന്ന അഗ്നിജ്വാലകൾ ചുറ്റും വിതറുന്നതുപോലുള്ള കാഴ്ചയായിരുന്നു അത്.

ഈ പ്രകാശത്തിന്റെ നിറങ്ങൾ ഭൂമിയിലും മരങ്ങളിലും കുറ്റിച്ചെടികളിലും ആളുകളുടെ മുഖങ്ങളിലും വസ്ത്രങ്ങളിലും പ്രതിഫലിച്ചു. ചുറ്റുപാടുകൾ പലവിധ വർണങ്ങളാൽ തിളങ്ങുന്നതായി കാണപ്പെട്ടു.

മൂന്നു പ്രാവശ്യം സൂര്യൻ ഭ്രാന്തമായ ചലനത്തോടെ കറങ്ങുന്നതായി തോന്നി. പിന്നീട് അത് വിറയ്ക്കുന്നതുപോലെയും ആടുന്നതുപോലെയും പെട്ടെന്ന് വശങ്ങളിലേക്ക് ചാഞ്ഞ് ജനക്കൂട്ടത്തിനുനേരെ താഴേക്ക് പതിക്കുന്നതുപോലെയും അനുഭവപ്പെട്ടു. സൂര്യൻ തങ്ങളുടെ മേൽ പതിച്ച് എല്ലാവരെയും നശിപ്പിക്കുമോ എന്ന ഭയത്തിൽ ആളുകൾ നിലവിളിച്ചു. പലരും മുട്ടുകുത്തി പ്രാർത്ഥിച്ചു.

ഏകദേശം പത്തുമിനിറ്റോളം ഈ അസാധാരണ പ്രതിഭാസം നീണ്ടുനിന്നതായി ദൃക്സാക്ഷികൾ വിവരിച്ചു. ഒടുവിൽ സൂര്യൻ വീണ്ടും ആകാശത്തിലെ പഴയ സ്ഥാനത്തേക്ക് മടങ്ങിയെത്തിയതുപോലെ കാണപ്പെട്ടു. തുടർന്ന് അത് പതിവുപോലെ ശാന്തമായും പ്രകാശമാനമായും നിലകൊണ്ടു.

ഇതോടെ ഫാത്തിമയിലെ പരിശുദ്ധ അമ്മയുടെ ദർശനങ്ങൾ അവസാനിച്ചു.

ഈ സംഭവത്തിലെ മറ്റൊരു ശ്രദ്ധേയമായ കാര്യം, മഴയിൽ പൂർണമായി നനഞ്ഞിരുന്ന അനേകം ആളുകളുടെ വസ്ത്രങ്ങൾ പെട്ടെന്ന് ഉണങ്ങിയതായി അവർ അനുഭവപ്പെട്ടുവെന്നതാണ്. മഴയും സൂര്യാത്ഭുതവും നേരിട്ട് അനുഭവിച്ച ജനക്കൂട്ടത്തിന് ഈ സംഭവം ജീവിതകാലം മുഴുവൻ മറക്കാനാവാത്ത അനുഭവമായി മാറി.

അനേകം സാക്ഷികൾ വിവരിച്ച സൂര്യാത്ഭുതം

ഈ അത്ഭുതത്തിന് സാക്ഷ്യം വഹിച്ചത് കോവ ദ ഇരിയയിൽ കൂടിയിരുന്ന ജനക്കൂട്ടം മാത്രമായിരുന്നില്ല. ദർശനസ്ഥലത്തുനിന്ന് ഏകദേശം നാൽപ്പതു കിലോമീറ്റർ അകലെയുള്ള ചില പ്രദേശങ്ങളിലുമുള്ള ആളുകൾ സൂര്യന്റെ അസാധാരണമായ ചലനങ്ങളും പ്രകാശവ്യത്യാസങ്ങളും കണ്ടതായി റിപ്പോർട്ടുകളുണ്ട്.

കോയിംബ്രയിലെ പ്രശസ്ത ശാസ്ത്രാധ്യാപകനായ ജോസെ മരിയ ദെ അൽമെയ്ദ ഗാരറ്റ് (José Maria de Almeida Garrett) ഈ സംഭവത്തെക്കുറിച്ച് വിശദമായ സാക്ഷ്യം നൽകി.

അദ്ദേഹത്തിന്റെ വിവരണപ്രകാരം, സൂര്യൻ ഭ്രാന്തമായ വേഗത്തിൽ സ്വയം കറങ്ങുന്നതായി തോന്നി. അന്തരീക്ഷത്തിന്റെ നിറത്തിലും പ്രകാശത്തിലും മാറ്റങ്ങൾ പ്രകടമായി. സൂര്യൻ പെട്ടെന്ന് ആകാശത്തിൽനിന്ന് വേർപെട്ട് ഭൂമിയിലേക്ക് പതിക്കുമെന്നതുപോലെയും രക്തംപോലെ ചുവന്ന നിറത്തിൽ കത്തിജ്വലിച്ചുകൊണ്ട് ഭൂമിയെ ഭീഷണിപ്പെടുത്തുന്നതുപോലെയും അനുഭവപ്പെട്ടു.

അദ്ദേഹം തന്റെ അനുഭവം വിവരിച്ചുകൊണ്ട്, ഒക്ടോബർ 13-ന് മുമ്പൊരിക്കലും അതിനുശേഷവും താൻ അത്തരമൊരു സൂര്യപ്രതിഭാസമോ അന്തരീക്ഷപ്രതിഭാസമോ കണ്ടിട്ടില്ലെന്ന് സാക്ഷ്യപ്പെടുത്തി.

ഈ സംഭവത്തെക്കുറിച്ച് പലവിധ വിശദീകരണങ്ങൾ പിന്നീട് ഉയർന്നുവന്നിട്ടുണ്ട്. വിശ്വാസികൾ ഇതിനെ ഫാത്തിമയിലെ മരിയൻ ദർശനങ്ങളുടെ ഭാഗമായി ദൈവികമായ അടയാളമായി കാണുന്നു. അതേസമയം, ഈ പ്രതിഭാസത്തിന്റെ സ്വഭാവത്തെക്കുറിച്ച് ശാസ്ത്രീയമായ ചർച്ചകളും നടന്നിട്ടുണ്ട്.

ഫാത്തിമ നൽകുന്ന സന്ദേശം: പ്രാർത്ഥനയും മാനസാന്തരവും

ഫാത്തിമയിലെ സൂര്യാത്ഭുതം ഒരു അസാധാരണ സംഭവത്തിന്റെ ഓർമ മാത്രമല്ല. അതിന്റെ ഹൃദയത്തിൽ പരിശുദ്ധ അമ്മ നൽകിയ സന്ദേശമാണ് നിലകൊള്ളുന്നത്: എല്ലാ ദിവസവും ജപമാല ചൊല്ലുക, പാപത്തിൽനിന്ന് പിന്തിരിയുക, ദൈവത്തോട് ക്ഷമ ചോദിക്കുക, പാപികളുടെ മാനസാന്തരത്തിനുവേണ്ടി പ്രാർത്ഥിക്കുക, സമാധാനത്തിനായി പ്രയത്നിക്കുക.

“നമ്മുടെ കർത്താവായ ദൈവത്തെ ഇനി വേദനിപ്പിക്കരുത്” എന്ന പരിശുദ്ധ അമ്മയുടെ വാക്കുകൾ ഇന്നും ഓരോ ക്രൈസ്തവന്റെയും മനസ്സാക്ഷിയെ ഉണർത്തുന്നു.

യുദ്ധങ്ങളും വിദ്വേഷവും കുടുംബപ്രശ്നങ്ങളും സാമൂഹിക സംഘർഷങ്ങളും മനുഷ്യജീവിതത്തെ മുറിവേൽപ്പിക്കുന്ന ഈ കാലഘട്ടത്തിൽ, ഫാത്തിമയുടെ സന്ദേശം കൂടുതൽ പ്രസക്തമാണ്. പ്രാർത്ഥനയിലൂടെ ദൈവത്തോടുള്ള ബന്ധം ആഴപ്പെടുത്താനും മാനസാന്തരത്തിലൂടെ ജീവിതം നവീകരിക്കാനും സ്നേഹത്തിലൂടെയും ക്ഷമയിലൂടെയും സമാധാനത്തിന്റെ ഉപകരണങ്ങളാകാനും പരിശുദ്ധ അമ്മ നമ്മെ ക്ഷണിക്കുന്നു.

ഫാത്തിമായിലെ ജപമാല രാജ്ഞിയേ, ഞങ്ങൾക്കുവേണ്ടി പ്രാർത്ഥിക്കണമേ!

ലോകത്തിൽ സമാധാനവും കുടുംബങ്ങളിൽ ഐക്യവും ഹൃദയങ്ങളിൽ മാനസാന്തരവും ഉണ്ടാകാൻ ഞങ്ങളെ സഹായിക്കണമേ. ആമ്മേൻ

✍ ഫാ. ജയ്സൺ കുന്നേൽ MCBS.