വി. സെറാഫിക് മാലാഖമാരോടുള്ള പ്രാർത്ഥന

മഹത്വപൂർണനായ ദൈവത്തോട് കൂടെ ആയിരിക്കുകയും ദൈവസ്നേഹത്താൽ ജ്വലിച്ച് ദൈവത്തിന് സദാസമയം ആരാധന സ്തുതികളർപ്പിക്കുകയും ചെയ്തുകൊണ്ടിരിക്കുന്ന സെറാഫിക്  മാലാഖാമാരെ, ദൈവത്തിന് ആരാധന സ്തുതികളർപ്പിക്കാൻ ഞങ്ങളെയും സഹായിക്കണമേ. ദൈവാലയത്തിലേക്കു പ്രവേശിച്ച എശയ്യ പ്രവാചകന് ആഴമായ അനുതാപവും പശ്ചാത്താപവും നൽകിയതുപോലെ ഞങ്ങൾക്കും ആ കൃപ നല്കണമേ. കുറ്റബോധത്തിൽ ജീവിക്കാതെ വിശുദ്ധ കുർബാനയാകുന്ന തീക്കട്ടയാൽ  ഞങ്ങളെ സ്പർശിച്ച് ഞങ്ങളിലുള്ള പാപത്തെയും പാപവാസനകളെയും മായിച്ച് ദൈവസ്നേഹാഗ്നിയാൽ ഞങ്ങളെ ജ്വലിപ്പിക്കണമേ. ദൈവത്തിന്റെ പദ്ധതികൾ ബോധ്യപ്പെടുത്തി എപ്പോഴും ദൈവഹിതം നിറവേറ്റുവാൻ ഞങ്ങളെ സഹായിക്കണമേ. ആമ്മേൻ